सप्तकोसीमा पानीको बहाव खतराको स्तरभन्दा माथि, ४६ ढोका खोलियो

सुनसरी- अविरल वर्षासँगै उर्लिएको बाढीका कारण सप्तकाेसी नदीमा पानीको बहाव यो वर्षकै उच्च मापन गरिएको छ।

मंगलबार बिहान गरिएको मापनअनुसार सप्तकाेसीको ब्यारेजमा पानीको बहाव प्रतिसेकेन्ड ३ लाख ३४ हजार ९९० क्युसेक पुगेको छ।

ब्यारेज प्रशासनका अनुसार सप्तकाेसीमा २ लाख क्युसेक प्रतिसेकेन्डभन्दा पानीको वहाबको स्तर माथि पुगे खतरा मानिन्छ।

पानीको बहाव खतराभन्दा माथि पुगेसँगै रातो बत्ती बालिएको छ भने ५६ मध्ये ४६ वटा ढोका खोलिएको छ। जलस्तर बढेर बाँध भत्काउने र बस्तीमा पस्ने खतरा भएसँगै ढोका क्रमशः खोलिएको काेसी ब्यारेज कन्ट्रोल रुमले जनाएको छ।

कन्ट्रोलका अनुसार पानीको बहाव र त्यसको चापले नहरमा क्षति पुग्न सक्ने देखिएपछि पूर्व र पश्चिम नहरका ढोका भने बन्द गरिएको छ।

सप्तरी र सुनसरीका सप्तकाेसी प्रभावित क्षेत्रका बासिन्दालाई सतर्क रहन जिल्ला प्रशासन कार्यालयहरुले आग्रह गरेका छन् ।

अहिले पनि उक्त क्षेत्रमा वर्षा भइरहेको छ भने सप्तकाेसीका सहायक नदीहरुमा बाढी झनै बढेको छ।