बाढीपहिरो : लमजुङमा १३ परिवारलाई सुरक्षित ठाउँमा सारियो

लमजुङमा सुन्दरबजार, राईनास नगरपालिका, दूधपोखरी र दोर्दी गाउँपालिकाका १३ घर परिवार सुरक्षित स्थानान्तरण भएका छन्।

दूधपोखरी–२ जल्केनीका कमलप्रसाद तामाङ र बेलबहादुर तामाङको घर पहिरोले पुरिएपछि उनीहरुलाई स्थानान्तरण गरिएको छ। दूधपोखरी–५ बन्देस्वाँराका तीन घर पनि पहिरोले पुरिएको प्रहरीले जनाएको छ।

बन्देस्वाँराका रामबहादुर तामाङ, कालीमाया तामाङ र कामी तामाङको घर पहिरोले पुरिएको हो। सोही स्थानका कलबहादुर तामाङको घर पनि पहिरोको जोखिममा भएपछि स्थानान्तरण गरिएको प्रहरीले जनाएको छ।

यसैगरी दोर्दी गाउँपालिका–३ काल्चेका दुई घर पनि पहिरोका कारण स्थानान्तरण भएका छन्। दोर्दी–५ लामीस्वाँराका कृष्णप्रसाद अधिकारीको घर पनि पहिरोले पुरिएको छ।

राईनास नगरपालिका–६ धमीलीकुवामा जुना सिलवालको घर डुबानमा परेको छ भने सुन्दरबजार–९ फेदीकुनास्थित रामप्रसाद लौनियाको घरमा पनि पहिरोले क्षति पुर्याएको छ। सुन्दरबजार–१ भागीरथी भञ्ज्याङका विकास श्रेष्ठ र केशवराज न्यौपानेको घरमा पनि पहिरोले क्षति पुगेपछि उनीहरुलाई स्थानान्तरण गरिएको छ।

अविरल वर्षा र पहिरोका कारण जिल्लाका अधिकांश स्थानमा उच्च सतर्कता अपनाइएको जिल्ला विपद व्यवस्थापन समितिले जनाएको छ। पहिरोका कारण लमजुङ–मनाङ सडक खण्ड पनि अवरुद्ध भएको छ। जिल्लाका अधिकांश ग्रामिण सडकहरु पनि अवरुद्ध भएका छन्।

गत साताको पहिरोमा परी जिल्ला सदरमुकाम बेसीसहरमा एकै परिवारका तीन जनाले ज्यान गुमाएका थिए।