बागमतीमा ८५३ जनालाई कोरोना संक्रमण (कुन जिल्लामा कति?)

काठमाडौं- बागमती प्रदेशमा कोरोना भाइरस संक्रमितकाे संख्या ८५३ पुगेकाे छ। शनिबार दुई जनामा संक्रमण भएसँगै संक्रमितको संख्या ८५३ पुगेको हो।

पछिल्लोपटक नुवाकोटमा एक जना र मकवानपुरमा एक जनामा कोरोना भाइरस संक्रमण भएको सामाजिक विकास मन्त्रालयले जनाएको छ।
संक्रमितमध्ये चार सय ३२ जना डिस्चार्ज भएका छन्।

मन्त्रालयका अनुसार प्रदेशमा रसुवा जिल्ला कोरोनामुक्त भएको छ। रसुवा संक्रमित ११ जना डिस्जार्च भएका छन्। रसुवा कोरोनामुक्त भए पनि जोखिम कायमै रहेको मन्त्रालयका प्रवक्ता पुरुषोत्तमराज सेढाईंले बताएका छन्।

प्रदेशमा ४ सय १२ जना संक्रमित विभिन्न अस्पतालमा उपचार गराइरहेका छन्। यस्तै कोरोना भाइरस संक्रमणबाट ९ जनाको मृत्यु भएको मन्त्रालयले जनाएको छ।

मन्त्रालयका अनुसार काठमाडौंमा २ सय ४६, ललितपुरमा ७५, भक्तपुरमा ४९ जना संक्रमित भएका छन्।

दोलखामा सबैभन्दा कम अर्थात् १० जनामा संक्रमण देखिएको छ। यस्तै नुवाकोटमा ३५, धादिङमा एक सय ३०, चितवनमा एक सय १३ जनामा कोरोना संक्रमण पुष्टि भएको छ।

सिन्धुलीमा २४, मकवानपुरमा ३८, रामेछापमा ३३, काभ्रेमा २० र सिन्धुपाल्चोकमा ६९ जनामा कोरोना संक्रमण पुष्टि भएको मन्त्रालयको शनिबार जारी बुलेटिनमा जनाइएको छ।

नेपालमा शनिबारसम्म कोरोना संक्रमितको कुल संख्या १७ हजार ५०२ पुगेको छ। तीमध्ये ६६.७ अर्थात् ११ हजार ६७३ जना कोरोना मुक्त भएर घर फर्किएका छन् भने ४० जनाको ज्यान गएको छ।