माछापुच्छ्रेमा पहिरोले घर बगायो, एकै परिवारका तीन जनाको मृत्यु

पोखरा- कास्कीको माछापुच्छ्रे गाउँपालिका–८ मा पहिरो घर बगाउँदा एकै परिवारका ३ जनाको मृत्यु भएको छ ।

स्थानीय प्रेमराज विकको घर माथिबाट आएको पहिरोमा पुरिएर उनका नातिहरु १६ वर्षीय कुशल विक, १४ वर्षीय समिर विक र १६ वर्षीया नातिनी रोजिना विकको मृत्यु भएको कास्की प्रहरीका प्रवक्ता डीएसपी सुवास हमालले जानकारी दिए ।

उनका अनुसार आज (शुक्रबार) बिहान ५ः४५ बजे २०० मिटर माथिबाट झरेको पहिरोले घर बगाउँदा उनीहरुको मृत्यु भएको हो । मृतक तीनै जना एउटै कोठमा सुतेका थिए । सुरक्षाकर्मी तथा स्थानीयवासीले पहिरोमा पुरिएका तीनै जनाको शव बाहिर निकालेका छन्।

पहिरोबाट प्रेमराज दम्पती भने सकुशल रहेको प्रहरीले जनाएको छ । उनीहरु बिहान सबेरै उठेका कारण पहिरोबाट जोगिएका थिए ।

प्रमुख जिल्ला अधिकारी ज्ञानप्रसाद ढकाल तथा प्रहरी प्रमुख जीवनराम श्रेष्ठ सहितको टोली घटनास्थलमा पुगेको छ।