ओली र प्रचण्डबीच आज विशेष वार्ता हुने, जुट्ला त सहमति ?

काठमाडौं- नेकपा भित्रको जारी विवाद मिलाउन दुई अध्यक्ष केपी शर्मा ओली र पुष्पकमल दाहाल प्रचण्डबीच विशेष वार्ता हुने भएको छ ।

आज मध्यान्ह प्रधानमन्त्री निवास बालुवाटरमा दुई अध्यक्षबीच 'वन टु वन' वार्ता हुने प्रचण्डको निजी सचिवालयले जनाएको छ । पटक पटक छलफल भएपनि कुनै सहमति जुट्न नसकेपछि आज विशेष छलफल हुन लागेको हो ।

दुई अध्यक्षबीच सहमति खोज्न भन्दै लगातार तीन पटक स्थायी समिति बैठक स्थगित गरेपनि अहिलेसम्म कुनै सहमति हुन सकेको छैन् । असार २२ गते डाकिएको स्थायी समिति बैठक पटक पटक स्थगित गर्दै साउन २ गतेसम्मलाई सारिएको छ ।

असार १० गतेबाट सुरु भएको स्थायी समिति बैठकमा अधिकांश सदस्यहरुले प्रधानमन्त्री ओलीको राजीनामा मागेका थिए ।

अर्का अध्यक्ष प्रचण्ड, बरिष्ठ नेता माधवकुमार नेपाल, झलनाथ खनाल, उपाध्यक्ष वामदेव गौतमसहितका नेताहरुले ओलीले अध्यक्ष र प्रधानमन्त्री दुबै पदबाट राजीनामा दिनु पर्ने बताउँदै आउका छन् ।

तर, प्रधानमन्त्री ओली कुनै पनि हालतमा दुईमध्ये एक पदबाट समेत राजीनामा नदिने अडानमा छन् । उनको अडानमा र नेताहरुको दबाबका कारण नेकपा भित्रको विवाद थप पेचिलो बनेको छ ।