काठमाडौं– अमेरिकी मिलेनियम च्यालेन्ज कर्पोरेसन (एमसीसी) बारे जनता समाजवादी पार्टी (जसपा) ले अझै केही निर्णय गर्न सकेको छैन।
पार्टीले एमसीसी सम्झौताबारे आधिकारिक धारणा तय भइनसेको जानकारी दिएको हो।
केही सञ्चारमाध्यममा एमसीसीबारे जसपाको आधिकारिक धारणा भनी प्रकाशित समाचारप्रति आपत्ति जनाउँदै जसपाले यस सम्बन्धमा कुनै निर्णय भइनसकेको स्पष्ट पारेको छ।
‘एमसीसी सम्बन्धमा पार्टीले निर्णय गरेको छैन। पार्टीका तर्फबाट कुनै आधिकारिक धारणा पनि सार्वजनिक गरिएको छैन’, अध्यक्ष उपेन्द्र यादव र महन्थ ठाकुरद्वारा सोमबार जारी विज्ञप्तिमा भनिएको छ, ‘पार्टीभित्र एमसीसीका सम्बन्धमा नीति तथा धारणा निर्माणका लागि आन्तरिक गृहकार्य र छलफल जारी नै रहेको अवस्था छ।’
अध्यक्षद्वयले पार्टीलाई नै बदनाम गराउने खालका गलत प्रचारको भ्रममा नपर्न आग्रह गरेका छन्।
प्रकाशित: Jul 13, 2020| 14:39 सोमबार, असार २९, २०७७
