६ वटा निजी प्रयोगशालाले पाए कोरोना परीक्षणको अनुमति

सरकारले ६ वटा निजी प्रयोगशालालाई कोरोना भाइरसको पीसीआर परीक्षणका लागि अनुमति दिएको छ।

स्वास्थ्य तथा जनसंख्या मन्त्रालयको नीतिअनुसार राष्ट्रिय जनस्वास्थ्य प्रयोगशालाले मापदण्ड पुगेका काठमाडौं उपत्यकाकाका ४ सहित ६ वटा निजी प्रयोगशालालाई अनुमति दिएको प्रयोगशालाका सूचना अधिकारी राजेश कुमार गुप्ताले जानकारी दिए ।

गुप्ताका अनुसार उपत्यकामा ललितपुर सानेपाको स्टार अस्पतालको प्रयोगशाला, सिनामंगलको काठमाडौँ मेडिकल कलेज शिक्षण अस्पतालको प्रयोगशाला, नयाँ बानेश्वरमा रहेको सेन्ट्रल डाईग्नोस्टिक ल्याव (सीडीएल) र लाजिम्पाटमा रहेको सूर्या हेल्थ केयर छन् ।

त्यसैगरी बुटवलमा रहेको नेशनल प्याथ ल्याव र नेपालगञ्जमा रहेको बागेश्वरी प्रयोगशालाले पनि पीसीआर परीक्षण गर्न अनुमति पाएका छन् ।

कोरोना परीक्षण गर्न अहिले देशभर २५ वटा प्रयोगशाला सञ्चालनमा छन् । सरकारी तवरबाटै अझै थप केही प्रयोगशाला आउने क्रममा छन् ।

अनुमति दिइएका यी प्रयोगशालामा सरकारले संकलन गरेका नमुनाको परीक्षण गरिनेछ। त्यसबापत सरकारले प्रयोगशालालाई प्रतिनमुना ५ हजार ५०० रुपैयाँ उपलब्ध गराउनेछ ।