काठमाडौं- तेह्रथुमका एक तत्कालीन गाविस सचिवले मृत्यु भैसकेका व्यक्तिको नाममा आफैँले सामाजिक सुरक्षा भत्ता बुझेर हिनामिना गरेको खुलेको छ।
तत्कालीन थोक्लुङ्ग गाविसका सचिव डम्बर कुमार गड्तौलाले मृत्यु भएका र हुँदै नभएका व्यक्तिको नामको सामाजिक सुरक्षा भत्ताबापतको १ लाख १८ हजार रुपैयाँ हिनामिना गरेको खुलेको हो।
अख्तियार दुरुपयोग अनुसन्धान आयोगको अनुसन्धानका क्रममा सचिव गड्तौलाले आर्थिक वर्ष २०६९/७० र ०७०/७१ मा हुँदै नभएका, मृत्यु भैसकेका र एकै व्यक्तिको नाममा दोहोरा तेहोरो गरी सामाजिक सुरक्षा भत्ता बुझेको खुलेको हो।
अख्तियारका प्रवक्ता प्रदीपकुमार कोइरालाले सामाजिक सुरक्षा भत्ता बापतको रकम हिनामिना गरेको अभियोगमा गड्तौलाविरुद्ध विशेष अदालतमा आइतबार मुद्दा दायर गरिएको जानकारी दिए।
प्रकाशित: Jul 12, 2020| 17:51 आइतबार, असार २८, २०७७
