म्याग्दीमा १२ जनाको शव भेटियो, २३ अझै सम्पर्कविहीन

म्याग्दी– बिहिबार राती परेको अविरल वर्षाका कारण म्याग्दीमा ठूलो धनजनको क्षति भएको छ ।

शनिबार बिहानसम्म म्याग्दीमा १२ जनाको शव भेटिएको म्याग्दीका प्रहरी नायव उपरिक्षक किरनजङ्ग कुँवरले जानकारी दिए । त्यस्तै २३ जना अझै वेपत्ता रहेको कुँवरले बताएका छन् ।

जिल्लाको धवलागिरी गाउँपालिका ६ मराङमा एक बालकसहित ९ जनाको शव भेटिएको प्रनाउ कुँवरको भनाइ छ । उनका अनुसार मराङमा एक सुत्केरी महिला सहित ८ जनालाई तत्काल उद्धार गर्नुपर्ने देखिएको छ भने ५ सय जनालाई सुरक्षित स्थानमा सारिएको छ । प्रनाउ कुँवरका अनुसार स्थानीय युवाहरुले ८ जनाको शव निकालेको र एक जना बालकको शव देखिएपनि निकाल्न सकिएको छैन।

प्रहरीको टोली मराङको घटना स्थल अझै पुग्न सकेको छैन भने मालिका गाउँपालिका ७ बिममा भने केही समयमा नेपाल प्रहरी र नेपाली सेना सहितको ५० जना सुरक्षाकर्मीको टोली घटना स्थल पुगेको उद्धारमा गएका प्रहरी निरिक्षक धुब्रप्रसाद शर्माले जानकारी दिए ।

उनका अनुसार वेपत्ताको खोजी कार्य सुरु भइरहेको छ । वेपत्ता हुनेहरुमा धवलागिरी ६ मराङका १४ जना र मालिका गाउँपालिका ७ बिमका ९ जना रहेका छन् ।

धवलागिरी गाउँपालिका ७ ताकमको पहिरोमा परी ज्यान गुमाएका २ र रघुगंगा गाउँपालिकाको डाँडाखानीमा खोलाले बगाएको एक जनाको शव शुक्रबार नै फेला परेको थियो । सम्पर्क बिहिन हुनेमा धवलागिरीका १४ जना र जमालिका–७ बिमका ८ जना रहेका छन् ।