प्रधानमन्त्रीसँगको संवाद छोडेर चितवन आएँ : प्रचण्ड

चितवन- नेपाल कम्युनिष्ट पार्टी नेकपाका अध्यक्ष पुष्पकमल दाहाल प्रचण्डले आफूले प्रधानमन्त्री केपी शर्मा ओलीसँगको संवाद छोडेर चितवन पुगेको बताएका छन्।

शनिबार अचानक चितवन पुगेका प्रचण्डले गम्भीर छलफल छाडेर आफ्नो निर्वाचन क्षेत्रको भ्रमणमा आएका दाबी गरेका हुन्।

चितवन पुगेर उनले नारायणी नदीको कटान रोक्न आवश्यक काम भइरहेकाले डर मान्नुपर्ने अवस्था नरहेको बताएका थिए।

भरतपुर महानगरपालिका वडा नं २७ र २८ को सीमाक्षेत्र न्यूरेचोकमा नारायणीले कटान गरेको क्षेत्रको निरीक्षण गर्दै प्रचण्डले तत्कालका लागि अस्थायी समाधानको काम नेपाली सेना, सशस्त्र प्रहरी, नेपाल प्रहरी र स्थानीयवासीले गरिरहेको बताए।

दाहालले आफू निर्वाचित भएदेखि नै राप्ती र नारायणीमा तटबन्धसहितको चक्रपथ अघि वढाएको बताए।

विस्तृत परियोजना प्रतिवेदन र वातावरणीय प्रभाव मूल्याङ्कन कार्य भइसकेको र बजेटका लागि अर्थ मन्त्रालयमा कुरा भईरहेको दाहालले जानकारी दिए। उनले सरकार सकारात्मक रहेकाले सो काम सम्पन्न हुने विश्वास दिलाए।

पानीपरेपछि शुक्रबारबाट सो क्षेत्रमा नारायणीले कटान गर्न शुरु गरेको हो।