बाढी-पहिरोपीडितकाे तत्काल पुनर्स्थापना गरिने

काठमाडौं- सरकारले बाढीपहिरो पीडितहरुको तत्काल पुनर्स्थापना गर्ने तयारी गरेको छ।

प्रधानमन्त्री निवास बालुवाटारमा आज बिहान बसेको राष्ट्रिय विपद जोखिम न्यूनिकरण तथा व्यवस्थापन प्राधिकरणको बैठकले बाढीपहिरो पीडितको उद्धार, राहतका साथै तत्काल पुनर्स्थापनाको काम गर्ने निर्णय गरेको हो।

बाढीपहिरोबाट विस्थापित भएकालाई नजिकको विद्यालयमा राखिने तथा जोखिममा रहेका वस्तीलाई पनि स्थानान्तरण गर्नेगरी काम गर्ने सरकारको तयारी छ।

बिहीबार र शुक्रबार देशका विभिन्न जिल्लामा आएको बाढी पहिराले ठूलो जनधनको क्षति भएपछि शनिबार बिहान प्राधिकरणको बैठक बसेको थियो।

बैठकमा प्रधानमन्त्री केपी शर्मा ओलीसहित प्रमुख प्रतिपक्षी दलका नेता, मन्त्रीहरु तथा सरोकारवाला विभिन्न निकायका प्रतिनिधिहरु सहभागी भएका थिए।

बाढीपहिरोको प्रकोप बढी भएका ठाउँमा सचेतता अपनाउन आग्रह गरिनुका साथै जोखिम न्यूनिकरणका लागि विभिन्न काम गर्न मातहतका निकायलाई निर्देशनसमेत दिइएको छ।

दुई दिनयताको बाढी पहिरोले देशभर २३ जनाको मृत्यु भएको छ भने ३६ जना बेपत्ता भएका छन्।
त्यस्तै २६ जना भन्दा बढी घाइते भएका छन्।