सेती नदीको पानी बस्तीसम्म, स्थानीय त्रसित

पोखरा– अविरल वर्षाका कारण पोखरा रामघाट हुँदै बगेको सेती नदीको पानी बस्तीसम्म पुगेको छ ।

पानीको सतह बढ्दा बस्तीसम्म पुग्न गएको हो । स्थानीयका अनुसार यस्तो माथी बस्तीसम्मै पानी आएको दोश्रो पटक हो । अहिले पानीको सतह केही घटे पनि लगातार पानी परिरहे बस्ती डुबानमा पर्ने स्थानीयको भनाइ छ । डुबानमा पर्ने डरले त्यहाँका केही स्थानीय माथिल्लो सतहमा बसिरहेका छन् ।

पछिल्लो २४ घण्टायता कास्की जिल्लामा सबैभन्दा बढी वर्षा हुने जल तथा मौसम विज्ञान विभागले जानकारी गराएको छ । विभागका अनुसार कास्कीमा २४ घण्टायता २६८ मिलिमिटर वर्षा मापन गरिएको छ ।

यस्तै पछिल्लो एक घण्टामा मात्रै १५.८ मिलिमिटर वर्षा मापन भएको छ । विभागले वर्षा जारी रहने उल्लेख गर्दै तटीय लगायतका क्षेत्रमा उच्च सतर्कता अपनाउनसमेत आग्रह गरेको छ ।

यस्तै कास्कीको लामाचौरदेखि पुरुन्चौर जाने बाटो पहिरोका कारण अवरोध भएको छ । बेसीचोकमा गएको पहिरोले आवातजावतमा कठिनाइ भएको स्थानीयले बताएका छन् । उक्त पहिरोले भोटीखोला खानेपानीमा समेत असर पुगेको जानकारीमा आएको छ ।