निजगढमा गाँजासहित ५ जना पक्राउ

पर्सा- निजगढमा गाँजासहित पाँच जना पक्राउ परेका छन्। प्रहरीले निजगढ नगरपालिका वडा नम्बर-११ स्थित तामागढी सडक खण्डबाट उनीहरुलाई पक्राउ गरेको हो। विशेष सूचनाको आधारमा ईलाका प्रहरी कार्यालय निजगढबाट खटिएको प्रहरी टोलीले निजगढ नगरपालिका ११ रतनपुर तामागढी सडकखण्डस्थित जंगलबाट २ जनालाई र कलैया उपमहानगरपालिका वडा नम्बर १६ उत्तरझिटकैयामा रहेको चिनि मिल नजिकै गाँजा किन्‍न तयार रहेका तीन जना गरी ५ जनालाई बिहीआार पक्राउ गरेको हो। 

रतनपुर तामागढी सडकखण्डमा गाँजा ओसारपसार तथा खरिद-बिक्रि भइरहेको विशेष सूचना पाए लगतै इलाका प्रहरी कार्यालय निजगढका प्रमुख प्रहरी निरीक्षक शंकर प्रसाद चोधरीको कमाण्डमा खटिएको प्रहरीले रतनपुरबाट पूर्वपश्चिम राजमार्गतर्फ जाँदै गरेको प्रदेश–२–०३–००४ प ८४४९ नम्बरको मोटरसाइकललाई रोकी चेकजाँच गर्दा मोटरसाइकलका चालक जितपुरसिमरा उपमहानगरपालिका वडा नम्बर १६ पिलुवाका ३७ वर्षीय ठाडा बहादुर दर्लामी मगर र मोटरसाईकलमा सवार निजगढ नगरपालिका वडा नम्बर १२ रामथलीका २६ वर्षीय बुद्घिलाल पाख्रिनले पिठ्युमा बोकेको कालो रङको झोला खानतलासी गर्दा ५ किलो गाँजा बरामद भएको इलाका प्रहरी कार्यालय निजगढका प्रमुख प्रहरी निरीक्षक शंकर प्रसाद चौधरीले जानकारी दिए। 

यस्तै कलैया उपमहानगरपालिका वडा नम्बर १६ उत्तरझिट्रकैयामा रहेको चिनि मिल नजिकै गाँजा किन्न बसेका थप तीन जनालाई प्रहरीले पक्राउ गरेको छ। गाँजासहित पक्राउ परेका मगर र पाख्रिनलाई प्रहरीले सोधपुछ गर्दा उनीहरुले कलैया उपमहानगरपालिका वडा नम्बर १६ उत्तरझिट्रकैयामा स्थित चिनि मिल नजिकै गाँजा पुर्‍याउन जानलागेको बताएपछि मगर र पाख्रिनलाई साथमै लिएर प्रहरी उत्तरझिट्रकैया पुगेको थियो। 

यसरी गएको प्रहरी टोलीले गाँजा किन्‍न तयार बसेका महरा र उनका साथीलाईसमेत पक्राउ गरेको हो। प्रहरीले उनीहरुबाट गाँजा किन्न ठिक पारिएको नगद रु पाँच हजारसमेत बरामद गरेको छ। पक्राउ पर्नेमा कलैया उपमहानगरपालिका वडा नम्बर १६ उत्तरझिट्रकैयाका ३९ वर्षीय श्रीलाल महरा, सोही ठाउँका २४ वर्षीय नवल किशोर राम र प्रसौनी गाँउपालिका वडा नम्बर ७ का ३८ वर्षीय हरिन्द्र महरा चमार रहेको प्रहरीले जनाएको छ।