जिमी ग्रुपविरुद्ध १८ करोडभन्दा बढी रुपैयाँ कर छलीको मुद्दा दायर

काठमाडौं- जिमी ग्रुप प्रालिविरुद्ध १८ करोडभन्दा बढी रुपैयाँ कर छलीको आरोपमा मुद्दा दर्ता गरिएको छ।

राजस्व अनुसन्धान विभागले ग्रुपविरुद्ध १८ करोड ३३ लाख २२ हजार सात सय ९६ रुपैयाँ कर छली गरेको अभियोगमा पाटनस्थित उच्च अदालतमा मुद्दा दर्ता गरेको हो।

सुशील थापा अध्यक्ष रहेको ग्रुपले नक्कली भ्याट बिलको प्रयोग गरेर कर छलेको विभागको दाबी छ। ग्रुपको स्थायी लेखा नम्बर ६०३५७१०४८ ले कर छली गरेको विभागको विज्ञप्तिमा उल्लेख छ।

आयोगले ग्रुपविरुद्ध बिगो रकम असुलउपर गरी त्यसको दोब्बर जरिवाना र कैद सजाय गर्न माग गरेको छ।

ग्रुपले मुअ करतर्फ पाँच करोड ९७ लाख ९९ हजार ८ सय २५, आयकर तर्फ १० करोड ७९ लाख १९ हजार १ सय १५ र लाभांश करतर्फ १ करोड ५६ लाख तीन हजार ८ सय ५६ राजस्व चुहावट गरेको विभागले ठहर गरेको छ।

ग्रुपका अध्यक्ष थापा नयाँ पत्रिका दैनिकका कार्यकारी निर्देशक पनि हुन्।