प्रधानमन्त्री ओलीद्वारा ब्राजिलियन राष्ट्रपतिलाई स्वास्थ्य लाभको कामना

प्रधानमन्त्री केपी शर्मा ओलीले दक्षिण अमेरिकी देश ब्राजिलका राष्ट्रपति जइर बोल्सोनारोलाई शिघ्र स्वास्थ्य लाभको कामना गरेका छन्।

कोरोना भाइरसको संक्रमण भएका बोल्सोनारोलाई प्रधानमन्त्री ओलीले ट्विट गरेर स्वास्थ्य लाभको कामना गरेका हुन्।

साथै प्रम ओलीले कोरोना महामारीसँग जुध्न नेपाल ब्राजिलको साथमा रहेको भन्दै ऐक्यवद्धता पनि जनाएका छन्।

ब्राजिलका राष्ट्रपति बोल्सोनारोलाई आजमात्रै कोरोना संक्रमण पुष्टि भएको थियो। ब्राजिलियन टिभी च्यानलमा उनी आफैंले यो कुराको पुष्टि गरेका छन्।

लक्षणहरु देखिएपछि उनले सोमबार कोरोना भाइरस परीक्षण गराएका थिए। यो उनको चौथो कोरोना परीक्षण थियो। उनलाई ज्वरो आएपछि कोरोनाभाइरस परीक्षण गरिएको थियो।

केही समयअघि उनी सार्वजनिक स्थलमा बिना मास्क देखिएका थिए। उनको समर्थनमा आयोजित एक र्‍यालीमा उनले समर्थकहरुसँग अंकमालसमेत गरेका थिए।

कोरोना भाइरसबाट अति प्रभावित सूचीको दोस्रो स्थानमा छ ब्राजिल। त्यहाँ कोरोनाबाट मर्नेको संख्या ६५ हजार नाघिसकेको छ। १६ लाख २३ हजारभन्दा बढी यो भाइरसबाट संक्रमित भइसकेका छन्।