कर्णालीमा १४ जना कोरोना संक्रमित थपिए, २८ जना डिस्चार्ज

कर्णाली प्रदेशमा आज मंगलबार १४ जना कोरोना संक्रमित थपिएका छन् ।

जसमध्ये सल्यानका दुई र सुर्खेतका १२ जना छन् । पशुपन्छी रोग अन्वेषण प्रयोगशाला सुर्खेतमा १० जना, कर्णाली स्वास्थ्य विज्ञान प्रतिष्ठान जुम्लामा तीन र दैलेख अस्पतालको प्रयोगशालामा एक जना गरी १४ जनामा कोरोना संक्रमण पुष्टि भएको हो ।

संक्रमित १४ जना भनिए पनि मन्त्रालयले १३ जनाको मात्रै विवरण खुलाएको छ । विवरण खुलाएका मध्ये ६ जना महिला र सात जना पुरुष छन् । योसँगै कर्णालीमा कोरोना संक्रमितको संख्या एक हजार ५३० जना पुगेको छ ।

सामाजिक विकास मन्त्रालयका स्वास्थ्य सेवा माहाशाखा प्रमुख डाक्टर लक्ष्मीनारायण तिवारीका अनुसार आज नै प्रदेशका विभिन्न अस्पताल र आइसोलेसनबाट २८ जना डिस्चार्ज भएका छन् ।

हालसम्म डिस्चार्ज हुनेको संख्या एक हजार २७५ जना पुगेको छ । अव संक्रमित पुष्टि भएका मध्ये २४९ जना विभिन्न अस्पताल र आइसोलेसनमा बसेका छन् ।