इन्जिनियरको गैरकानुनी कमाइ ३ करोड १० लाख

खानेपानी तथा ढल व्यवस्थापन विभाग अन्तर्गत क्षेत्रीय आयोजना व्यवस्थापन कार्यालय, नेपालगंजमा कार्यरत सिनियर डिभिजन इन्जिनियर पूर्ण प्रसाद उपाध्यायले तीन करोडभन्दा बढी गैरकानुनी सम्पत्ति आर्जन गरेको खुलेको छ।

उपाध्यायले करिब १४ वर्षे जागिर अवधिमा तीन करोड १० लाख २७ हजार रुपैयाँ गैरकानुनी आर्जन गरेको अख्तियार दुरुपयोग अनुसन्धान आयोगको अनुसन्धानबाट खुलेको हो।

उपाध्यायले गैरकानूनी सम्पत्ति आर्जन गरी अस्वाभाविक उच्चजीवन यापन गरिरहेको भन्ने उजुरीका आधारमा अनुसन्धान गरेको अख्तियारका प्रवक्ता प्रदीपकुमार कोइरालाले जानकारी दिए।

उपाध्याय सामुदायिक खानेपानी तथा सरसफाई इकाई कार्यालय डडेल्धुरामा २०६३ पुस ५ मा स्थायी नियुक्ति भएका थिए। २०६९ चैत १५ मा सिनियर डिभिजन इन्जिनियर पदमा बढुवा भएका उपाध्यायले पाँच करोड एक लाख ४३ हजार चार सय ५१ रुपैयाँ आर्जन गरेको खुलेको छ।

जस मध्ये एक करोड ९१ लाख १६ हजार दुई सय ९८ रुपैयाँको मात्र स्रोत खुलेको अख्तियारले जनाएको छ। उपाध्याय विरुद्ध अख्तियारले मंगलबार विशेष अदालतमा मुद्दा दायर गरेको छ।