किसानलाई आत्मनिर्भर बनाउन बाख्रा वितरण

विपन्न परिवारको छनौट गरी प्रदेश सरकारले रोहिणी गाउँपालिकामा बाख्रा वितरण गरेको छ ।

प्रदेश सभा सदस्य डा. कृष्ण न्यौपानेले जिल्लाको दक्षिणी क्षेत्रमा रहेको रोहिणी गाउँपालिकाका ४४ जना किसानलाई दुई–दुई वटा उन्नत जातका बाख्रा वितरण गरेका हुन् ।

किसानलाई आत्मनिर्भर बनाउने अभियान स्वरुप विपन्न घरधुरीलाई उन्नत जातको बाख्रा प्रदान गरिएको डा. न्यौपानेले बताए । उनले भने, ‘‘मुख्यमन्त्री ग्रामिण विकास कार्यक्रम अन्तर्गत हामी सबैलाई रोजगारी दिने अभियानमा छौं । रोजगारी सृजना गर्ने अभियान अन्तर्गत अति विपन्न परिवारलाई उन्नत जातको बाख्रा वितरण गरिएको हो ।’

डा. न्यौपानेले बाख्रा लिनको लागि धकधई हाटबजारमा भेला भएका किसानलाई भने, ‘अहिलेको सरकार किसान र मजदुरहरुकै सरकार हो ।

तपाईंहरु इमान्दारीका साथ काम गर्नुहोस् । दिएको बाख्रा राम्रोसँग पाल्नुहोस् । घरघरमा प्राविधिक पठाउने काम सरकारले गर्छ । तपाईंहरुलाई आत्मनिर्भर बनाउने गरी कार्यक्रम ल्याउने जिम्मा हाम्रो हो । मेहनत, इमान्दारीता तपाईहरुमा हुनुपर्छ ।’

रोहिणी गाउँपालिका अध्यक्ष सनोज कुमार यादबले प्रदेश सरकारको कार्यक्रम अन्तर्गत पालिकाले अति विपन्न परिबारको छनौट गरेको बताए । उनले भने, ‘तपाईहरुले राम्रोसँग पाल्नुहोस् । अहिले राम्रोसँग काम गरेमा पछि पुनः सहयोग पाइराख्नुहुन्छ । ’

पालिकाका प्रमुख प्रशासकीय अधिकृत रोमनाथ न्यौपानेले रोहिणी गाउँपालिकाले यस वर्ष ४४ जना अति विपन्न किसानलाई उन्नत जातका दुईवटा बाख्रा दिएको बताए ।