गण्डकीमा १,११३ लाई कोरोना संक्रमण (जिल्लागत विवरणसहित)

काठमाडौं- गण्डकी प्रदेशमा सोमबार साँझसम्म कोरोना भाइरस संक्रमितको संख्या १,११३ पुगेको छ। तिनमा ९६९ पुरुष र १४४ महिला छन्।

प्रदेशमा सबैभन्दा बढी संक्रमित नवलपरासी पूर्वमा २५७ जना छन् भने सबैभन्दा थोरै मुस्ताङ र मनाङमा एक एक जना छन्।

नवलपरासी पूर्वमा २५७ जना कोरोना भाइरस संक्रमित भएका छन्। तिनमा ३१ महिला र २२६ पुरुष छन्।  मुस्ताङमा १ पुरुषमा संक्रमण भएको छ।मनाङमा पनि १ पुरुषमा संक्रमण भएको छ।

यस्तै पर्वतमा संक्रमित ९० जनामध्ये ८० पुरुष र १० महिला छन्। म्याग्दीमा ५ महिला र १४ पुरुष गरी १९ जनामा कोरोना भाइरस संक्रमण भएको स्वास्थ्य निर्देशनालय गण्डकी प्रदेशले जनाएको छ।

बाग्लुङमा २०८ जना संक्रमित भएका छन्। तिनमा १७ महिला र १९१ पुरुष छन्। स्याङ्जामा महिला २३ र पुरुष १६२ गरी संक्रमितको संख्या १६२ पुगेको छ।
निर्देशनालयका अनुसार सोमबार साँझसम्म कास्कीमा १९ महिला र ४४ पुरुष गरी ६३ जनालाई कोरोना भाइरस संक्रमण भएको छ। 

यस्तै गोरखामा संक्रमितको संख्या ९३ पुगेको छ। तिनमा १५ महिला र ७८ पुरुष छन्। तनहुँमा १७ महिला र १२२ पुरुष गरी १३९ जनालाई कोरोना भाइरस संक्रमण भएको निर्देशनालायले जनाएको छ।

प्रदेशमा विभिन्न अस्पतालमा ७९७ जना आइसोलेसनमा छन् भने ३१६ जना निको भएर घर फर्किएका छन्। तीमध्ये २७ महिला र २८९ पुरुष छन्।
गण्डकीमा हालसम्म कोरोना भाइरसबाट ४ जनाको ज्यान गएको छ।