कालिकोट– जिल्लाको तिलागुफा नगरपालिका–५ खल्लागाउँका २४ घरधुरी विस्थापित भएका छन्। निरन्तर पानी पर्न थालेपछि गाउँमाथिबाट पहिरो खस्न थालेकाले गाउँ नै जोखिममा परेको हो।
निरन्तर पहिरो आउन थालेपछि गाउँ नै जोखिममा परेको किर्डाक कालिकोटका शैक्षिक अधिकृत धनीराम न्यौपानेले बताए।
‘२४ घरधुरीका १२६ परिवार प्रभावित भएका छन्’, उनले भने, ‘तीमध्ये ६२ जना बालबालिका, एक जना वृद्ध र तीन जना अपांगता भएका अतिप्रभावित भएका छन्।’
पहिरोका कारणले गाउँमा लगाइएको बालीनाली नष्ट भएको र अहिले गाउँलेलाई सुरक्षित स्थानमा सारिएको स्थानीयवासी दिनेश चदाराले बताए। ‘अहिले गाउँलेलाई सुरक्षित स्थानमा राखिएको छ’, उनले भने, ,‘२४ घर भत्किएका छन्।’ -रासस
प्रकाशित: Jul 06, 2020| 16:48 सोमबार, असार २२, २०७७
