आँपको लोभ देखाएर बालिकाको बलात्कारपछि हत्या, भारतिय नागरिक पक्राउ

जनकपुर- केही दिन पहिले नदी किनारमा मृत भेटिएकी ११ वर्षीया बालिकाको भारतिय नागरिकले बलात्कारपछि हत्या गरेको खुलेको छ।

भैँसी चराउन जाँदा वेपत्ता भएकी जनकपुरधाम उपमहानगरपालिका–२१ का विनोद पञ्जियारकी ११ वर्षीया छोरी कञ्चन कुमारी पञ्जियारको बलात्कारपछि हत्या भएको प्रहरीले जनाएको छ।

बलात्कारपछि हत्या गरेको अभियोगमा भारत उत्तर प्रदेश राज्यको काकोरीग्राम पञ्चायत–११ का ३२ वर्षीय दिपु सिंहलाई प्रहरीले पक्राउ गरेको छ।

धनुषाका प्रहरी प्रमुख प्रहरी उपरीक्षक रमेश बस्नेतले चौधरी र मिश्र इण्डस्ट्रिजमा चार/पाँच महिना अघि काम गर्न आएका सिंहले इण्डस्ट्रिजमा आँप टिप्न आउँदा कञ्चनलाई आँप दिन्छु भनि प्रलोभन देखाई बगैँचाको एकान्त कुनामा लगेर बलात्कारपछि हत्या गरेको बताए।

हत्यापछि उनले शवलाई सोही ठाउँमा लुकाई भोलिपल्ट बिहान आफूले प्रयोग गर्दै आएको ब्ल्याङ्केटमा बेरेर दुधमति नदी नजिकको झाडीमा फालेको प्रहरी समक्ष स्वीकार गरेको बस्नेतले जानकारी दिए।

१७ गते भैँसी चराउन आँपको बगैँचा पुगेकी कञ्चन बेपत्ता बनेकी थिइन्। त्यसको दुई दिनपछि दुधमति नदी छेउमा उनको शव अर्धनग्न अवस्थामा फेला परेको थियो।

धनुषा प्रहरीले घटना भएकै दिन सोही वडाबाट श्मशान घाटमा बस्ने अघोरी बाबा र दुई जना अन्य नाम नखुलेका युवाहरुलाई नियन्त्रणमा लिएर अनुसन्धान अगाडि बढाएको थियो।