ठेकेदारकाे लापरबाहीविरुद्ध हरिसिद्धि–गोदावरी सडक अवरुद्ध

काठमाडौं- सडक मर्मत सुधारको माग गर्दै स्थानीय बासिन्दाले सोमबार बिहानैदेखि हरिसिद्धि–गोदावरी सडक अवरुद्ध पारेका छन्।

पानी पर्दा हिलाम्मे र घाम लाग्दा धुलाम्मे हुँदा सडकमा आवागमनमा निकै कठिन भएकाले सडक अवरुद्ध गर्नुपरेको गोदावरी नगरपालिकाका मेयर श्री गजेन्द्र महर्जनले बताए।

उनका अनुसार जति पहल गर्दा पनि ठेकेदारले अटेर गरेपछि स्थानीय बासिन्दा विरोधमा उत्रिएका हुन्। उनले भने, ‘ठेकेदारका गम्भीर लापरबाहीका कारण समयमै बाटो मर्मत नहुँदा स्थानीयले निकै सास्ती पाएका छन्।’

तत्काल बाटो मर्मत हुने विश्वासिलो प्रतिबद्धता नआएसम्म खुल्न नदिइने मेयर महर्जनले बताए।

बाटो खुलाउन जनप्रतिनिधि, प्रहरी र स्थानीयबीच कुराकानी भइरहेको प्रहरीले जनाएको छ।

मेयर महर्जनका अनुसार यो सडकको मर्मत सुधारको ठेक्का गुरु अधिकारीले लिएका छन्। जनप्रतिनिधिलाई समेत अटेर गरेपछि विरोधमा उत्रिएको उनको भनाइ छ।