लाखौं खर्चेर बनाएको 'हेलो सीएम' एप प्लेस्टोरमा भेटिँदैन

जनकपुरधाम– गठन भएको एक वर्ष नबित्दै प्रदेश २ सरकारले महिला हिंसा न्यूनीकरणका लागि बडो तामझामका साथ हेलो सीएम नामको एपको लन्च गरेको थियो। मुख्यमन्त्री लालबाबु राउत आफैंले एप सार्वजनिक पनि गरे। एप प्रयोगमा नआउँदै प्लेस्टोरमा  भेटिन छोडेको छ।  

महिला हिंसा न्यूनीकरणमा महत्त्वपूर्ण भूमिका निर्वाह गर्ने अपेक्षाका साथ सुरु गरिएको एप प्रयोगविहीन हुँदासमेत प्रदेश सरकार बेपरवाह बनेको छ। २०७५ कात्तिक ११ गते समुदाय–प्रहरी साझेदारी कार्यक्रमको उद्घाटन गर्दै मुख्यमन्त्री लालबाबु राउतले ‘हेल्लो सिएम’ एप सार्वजनिक गरेका थिए। उक्त एप अहिले गुगल प्लेस्टोरबाट गायब भएको छ।

एपको निर्माण इन्जिनियर आदित्य राजले गरेका थिए। इन्जिनियर राजका अनुसार प्रदेश सरकारले सो एप प्रयोग नगरेका कारण प्लेस्टोरमा नभेटिएको हो। एप निर्माणका लागि उनलाई ६ लाख रुपैयाँ खर्च लागेको थियो। इन्जिनियरले भने प्रदेश सरकारले सो एप बनाएबापत पैसा नदिएको गुनासो गरे। उनले भने ‘मलाई यो एप बनाउन ६ लाख रुपैयाँ खर्च परेको थियो, त्यो रुपैयाँ न प्रदेश सरकारले मलाई दिने इच्छा देखायो, न मैले माग गरेँ।’

सो एप इन्स्टल गरेपछि महिला हिंसामा परेको बखत मोबाइल तीन पटक हल्लाएमा त्यसको जानकारी नजिकको प्रहरी कार्यालयमा आकस्मिक कलको रूपमा पुग्ने दावी गरिएको थियो। एप रहेको मोबाइल तीन पटक जोडले हल्लाएपछि पीडितको लोकेसन समेत प्रहरीलाई जानकारी हुने एप निर्माता इन्जिनियर आदित्य राजले दावी गरेका थिए।