अछाममा एकै दिन २०९ जना कोरोना संक्रमित थपिए

अछाममा शुक्रबार एकै दिन २०९ जनामा कोरोना सङ्क्रमण पुष्टि भएको छ।

अछामका विभिन्न स्थानबाट थ्रोट स्वाब सङ्कलन गरेर राष्ट्रिय प्रयोगशाला टेकु, पाटन अस्पताल र सेती प्रादेशिक अस्पतालमा गरिएको परीक्षणमा एकै दिन ठूलो संख्यामा संक्रमण पुष्टि भएको हो।

जिल्ला स्वास्थ्य कार्यालयका अनुसार सङ्क्रमित हुनेमा साँफेबगर नगरपालिकामा ५२ जना, चौरपाटी गाउँपालिकामा २४ जना, ढकारी गाउँपालिकामा २७ जना, मङ्गलसेन नगरपालिकामा २९ जना, तुर्माखाँद गाउँपालिकामा १९ जना, मेल्लेख गाउँपालिका १५ जना छन्।

यस्तै बान्नीगढी जयगढ गाउँपालिकामा २९ जना, कमलबजारमा सात जना र पञ्चदेवल विनायक नगरपालिकामा ६ जना नयाँ सङ्क्रमित पुष्टि भएको जिल्ला स्वास्थ्य कार्यालय अछामका सूचना अधिकारी देव जोशीले जानकारी दिए।

योसँगै अछाममा कोरोना सङ्क्रमितको सङ्ख्या ५२१ पुगेको छ। जसमध्ये ४५ जना कोरोना सङ्क्रमण जितेर घर गइसकेका छन्।

स्वाब संकलन गरिएका ७९३ जनाको परीक्षणको क्रममा छ। सङ्क्रमित हुनेमा अधिकांश भारतबाट आएर क्वारेन्टिनमा बसेकाहरु छन्।