दैलेखमा इन्जिनियरसहित चार जना घूससहित नियन्त्रणमा

दैलेखको खानेपानी, सिंचाई तथा उर्जा विकास कार्यालयका निमित्त कार्यालय प्रमुख (इन्जिनियर) टोपेन्द्र सुन्दर मल्लसहित चार जना घूससहित पक्राउ परेका छन्।

भगवतीमाई गाउँपालिका–३ सानटडा खोला तटवन्धन निर्माणमा उपभोक्ताबाट लिएको दुई लाख ४१ हजार १६ रुपैयाँ घूससहित चार जनालाई अख्तियार दुरुपयोग अनुसन्धान आयोगको टोलीले नियन्त्रणमा लिएको हो।

तटवन्ध निर्माणको अन्तिम किस्ता भुक्तानी लिँदा उपभोक्ताबाट घूस लिएको आरोपमा मल्लसहित सव–इन्जिनियर द्वय विरेन्द्र चन्द र रन्जित श्रेष्ठ तथा सुरपभाइजर लक्ष्मी पाण्डेलाई नियन्त्रणमा लिएको अख्तियारले जनाएको छ।

घूस लिएको उजुरीका आधारमा आयोगको सुर्खेतस्थित कार्यालयबाट खटिएको टोलीले मल्ललाई कार्यालय परिसरबाट र चन्दलाई कार्यस्थलबाट नियन्त्रणमा लिएको प्रवक्ता प्रदीप कोइरालाले जानकारी दिए।

नियन्त्रणमा लिएपछि खानतलासी गर्दा मल्लको आवासबाट उक्त नगद रुपैयाँ बरामद गरेको अख्तियारले जनाएको छ।