प्रदेश १ मा १६ जना कोरोना संक्रमित थपिए

विराटनगर– प्रदेश १ मा शुक्रबार १६ जना कोरोना संक्रमित थपिएका छन् । थपिएकामा ६ महिला र १० पु्रुष छन् ।

सामाजिक विकास मन्त्रालयका अनुसार सुनसरीमा १०, झापामा ४ र मोरङमा २ जना छन् । सुनसरीको कोशी गाउँपालिकामा ८ र देवानगञ्जमा २ जना, झापाको दमकमा ३ र मेचीनगरमा १, मोरङको विराटनगरमा २ जनामा कोरोना पोजेटिभ रिपोर्ट आएको सामाजिक विकास मन्त्रालयले जनाएको छ । प्रदेश १ मा १६ जना थपिएसँगै कोरोना संक्रमितको संख्या ५१९ पुगेको छ ।

प्रदेश १ मा विहीबार साँझ २१ जना डिस्चार्ज भएका छन् । डिस्चार्ज हुनेको संख्या ३७७ पुगेको छ ।

प्रदेश १ का झापामा २१५, मोरङमा १३३, सुनसरीमा ८५, उदयपुरमा ५२, धनकुटामा ८, भोजपुरमा ६, खोटाङ र ताप्लेजुङमा ४–४, तेह्रथुम र पाँचथरमा ३–३, संखुवासभा र इलाममा २–२, सोलुखुम्वु र ओखलढुङ्गामा १–१ जना संक्रमित भएको मुख्यमन्त्री तथा मन्त्रिपरिषद् कार्यालयले जनाएको छ ।

हिमाली र पहाडी ८ जिल्लाका संक्रमित निको भए

प्रदेश १ मा १४ मध्ये हिमाली र पहाडी क्षेत्रका ८ जिल्लाका संक्रमित उपचार पछि निको भएका छन् ।

संक्रमण देखिएका धनकुटा, भोजपुर, खोटाङ, सोलुखुम्बु, संखुवासभा, तेह्रथुम, इलाम र ताप्लेजुङ जिल्लाका संक्रमित निको भएर घर फर्किएका छन् । ८ जिल्लामा ३० जना संक्रमित भएका थिए ।

३ हजार ८ सयको रिपोर्ट आउन बाँकी

प्रदेश १ मा शुक्रबार सम्म २१ हजार ६ सय १४ शंकास्पद व्यक्तिको स्वाव संकलन गरिएको छ । स्वाव संकलन गरिएका १७ हजार २ सय २२ जनाको रिपोर्ट नेगेटिभ आएको छ ।

स्वाव संकलन गरिएका मध्ये ३ हजार ८ सय ७३ जनाको रिपोर्ट आउन बाँकी रहेको छ । प्रदेश १ मा शुक्रबार मात्र ५ सय ९६ जनाको स्वाव संकलन गरिएको छ ।