नारायणी र राप्ती नदी तटबन्धनका लागि ५० अर्ब रूपैयाँ माग

चितवन– नारायणी नदी व्यवस्थापन आयोजनाले नारायणी र राप्ती नदी तटबन्धनका लागि ५० अर्ब रुपैयाँ माग गरेको छ।

आयोजनाले दुवै नदीको विस्तृत आयोजना प्रतिवेदन तयार गरी सिँचाइ विभागमा पेश गरेको छ।

आयोजनाका सिनियर डिभिजनल इञ्जिनीयर हरिबहादुर थापाका अनुसार नदीमा तटबन्धन र त्यसमाथि ग्राबेल बाटो हुने छ।

प्रतिवेदनअनुसार नारायणी नदीको नवलपरासीतर्फ ६३ किलोमिटर तटबन्धन गरिनेछ भने यसअघि तटबन्धन गरिएको १० किलोमिटर क्षेत्रलाई मर्मत सम्भार गरिने छ।

थापाका अनुसार नारायणी नदीको चितवनतर्फ ५० किलोमिटर तटबन्धन गरिनेछ। पहिले निर्माण भएको १३ किलोमिटर भागलाई मर्मत गरिने छ।

राप्तीमा चितवन र मकवानपुर क्षेत्रको १०५ किलोमिटर मध्ये स्वीस परियोजनाले पूर्वी चितवनमा गरेको तटबन्धनको बाहेकको भूभाग तटबन्ध गरिने जनाइएको छ।

नदीतर्फ ग्याबिन जालिबाट संरक्षण गरिनेछ। तटबन्धनमा ठूलो खर्च लाग्ने भएकाले दाता र ऋणको खोजी गरिँदैछ।

२०६६ सालदेखि ‘जनताको तटबन्धन’ नामक आयोजनामार्फत नारायणी नदीमा तटबन्धन थालिएको हो। हालसम्म नदी तटबन्धनमा एक अर्ब ७२ करोड रुपैयाँ खर्च भइसकेको आयोजनाले जनाएको छ।

रासस