धनगढीको बजेट १ अर्ब ६३ करोड

धनगढी उपमहानगरपालिकाको पाँचौँ नगरसभाले उपमहानगरपालिकाले ल्याएको नीति, कार्यक्रम तथा बजेट पारित गरेको छ ।

उपमहानगरपालिकाकी उपप्रमुख सुशीलामिश्र भट्टले आर्थिक वर्ष २०७७-७८ का लागि रु एक अर्ब ६३ करोड ८२ लाख बराबरको अनुमानित बजेट तथा नीति कार्यक्रम नगरसभामा प्रस्तुत गरिन्। प्रस्तुत बजेटअनुसार चालू खर्चतर्फ रु ८५ करोड र पुँजीगत खर्चतर्फ रु ७८ करोड ८२ लाख रहेको जनाइएको छ ।

बजेटमा आयतर्फ आन्तरिक आय रु १९ करोड ९९ लाख ७३ हजार ६६०, वित्तिय समानीकरण रु २९ करोड दुई लाख, राजस्व बाँडफाँटबाट रु १८ करोड ४० लाख, सशर्त अनुदान रु ५० करोड २६ लाख, प्रदेश सरकार समपूरक कोष अनुदान रु दुई करोड ५० लाख, प्रदेश सरकार विशेष अनुदान रु एक करोड १४ लाख र अन्य आय रु ४२ करोड ५० लाख २६ हजार ३४० उल्लेख गरिएको छ ।

नगरसभामा रु एक अर्ब ४८ करोड चार लाख ४८ हजारको बजेट पेश गरिएको छ । जसमध्ये चालूतर्फ ७६ करोड ३६ लाख ४२ हजार १६६ रुपैयाँ ३८ पैसा रहेको छ भने पुँजीगततर्फ रु ८१ करोड, ६८ लाख पाँच हजार ८३३ रुपैयाँ ६२ पैसा रहेको छ । नगरसभामा पेश भएको बजेट नीति तथा कार्यक्रममाथि नगरसभा सदस्यले छलफल गरेका थिए ।