विद्युत प्राधिकरणका ८ कर्मचारी मिलेर ३४ लाख बढी राजस्व हिनामिना

काठमाडौं- नेपाल विद्युत प्राधिकरणको बर्दिबास उप–वितरण केन्द्रमा कार्यालय प्रमुखसहित आठ कर्मचारीले विद्युत महशुल बापतको करिब साढे ३४ लाख रकम हिनामिना गरेको खुलेको छ।

वितरण केन्द्रका तत्कालीन प्रमुख सञ्जीव शर्मासहित आठ कर्मचारीले विद्युत महशुल बापतको ३४ लाख ४४ हजार ४८६ रुपैयाँ हिनामिना गरेको खुलेको हो।

अख्तियार दुरुपयोग अनुसन्धान आयोग तथा प्राधिकरणले गठन गरेको छानविन समितिको अनुसन्धानका क्रममा नियम विपरीत बिक्री संशोधन र क्रेडिट बिल दोहोरो पोस्टिङ गरी उनीहरुले राजस्व अपचलन गरेको खुलेको छ।

शर्माले २० लाख ३३ हजार २७२ रुपैयाँ हिनामिना गरेको अनुसन्धानबाट खुलेको अख्तियारका प्रवक्ता प्रदीप कुमार कोइलाले जानकारी दिए।

शर्माले कर्मचारीहरूको पासवर्ड आफैँले राखी रातको समयमा गोप्य रुपमा काम गर्ने गरेको खुलेको छ।

यस्तै ज्यालादारी कर्मचारीहरु अरविन्द प्रसाद जयसवालले चार लाख ७५ हजार ४६६, बागेश्वरी कुमारी कर्णले ५३ हजार ८२१, चन्द्रभुषण महतोले चार लाख ६ हजार १३९ रुपैयाँ राजस्व अपचलन गरेको खुलेको अख्तियारले जनाएको छ।

यस्तै लेजर पोस्टिङ गर्ने ज्यालादारी कर्मचारीहरु धर्मेन्द्र कुमार महतोले ६६ हजार ८३७ रुपैयाँ, अजितमान सिंहले २२ हजार ८१३ रुपैयाँ, स्मिता कट्टेलले सात लाख ७४ हजार १०४ रुपैयाँ र अन्जु कुमारी बस्नेतले १२ हजार १४ रुपैयाँ हिनामिना गरेको खुलेको अख्तियारले जनाएको छ।

राजश्व रकम हिनामिना गर्ने आठै जनाविरुद्ध अख्तियारले हिनामिना गरेको रकम असुलीको माग दाबी गर्दै विशेष अदालतमा मुद्दा दायर गरेको छ।