प्रदेश १ : कोरोना रोकथाममा १९ करोड सकियो

विराटनगर– प्रदेश सरकारले कोरोना भाइरसको रोकथाम तथा नियन्त्रणमा १९ करोड ८२ लाख रुपैयाँ खर्च गरेको छ। प्रदेश जनसुरक्षा कोषमा जम्मा भएको रकमबाट सो खर्च गरिएको सरकारले बताएको छ।

खर्च सार्वजनिक गर्न माग गर्दै प्रमुख प्रतिपक्ष दल नेपाली कांग्रेसले सोमबारको प्रदेश सभा वैठक अवरुद्ध पारेपछि प्रदेश सरकारले मंगलबार खर्च विवरण प्रदेश सभा बैठकमा सार्वजनिक गरेको हो।

प्रदेश १ सरकारका प्रवक्ता आन्तरिक मामिला तथा कानुनमन्त्री हिक्मतकुमार कार्कीले प्रदेशसभा बैठकमा खर्च विवरण सार्वजनिक गरे। जनसुरक्षा कोषमा ९ करोड ६९ लाख रुपैयाँ मौज्दात रहेको उनको भनाइ छ। प्रदेश जनसुरक्षा कोषमा हालसम्म २९ करोड ५१ लाख ७३ हजार रुपैयाँ रकम संकलन भएको छ।

कोरोना जनसुरक्षा कोषमा भएको रकम मुख्यमन्त्री तथा मन्त्रिपरिषद् कार्यालयमार्फत ५० लाख १ सय १५, भौतिक पूर्वाधार विकास मन्त्रालयमार्फत २ करोड, आन्तरिक मामिलामार्फत १५ करोड ३४ लाख र सामाजिक विकास मन्त्रालयमार्फत २ करोड ४८ लाख ७१ हजार रुपैयाँ खर्च भएको मन्त्री कार्कीले बताए।

सरकारको नियमित बजेटबाट ३ करोड ३० लाख र संघीय सरकारबाट ३ करोड ३० लाख रुपैयाँ प्राप्त भएको उनले बताए।

प्रदेश सरकारले क्वारेन्टिन निर्माण तथा व्यवस्थापन, होल्डिङ एरिया निर्माण, कोभिड अस्पताल तथा सीमामा होल्डिङ एरिया व्यवस्थापनमा रकम खर्च गरेको जनाएको छ । जिल्ला समन्वय समितिहरूलाई अनुगमनका लागि सहयोग, स्वास्थ्य सामग्री ढुवानी व्यवस्थापन लगायतका शीर्षकमा पनि कोषको रकम खर्च गरिएको कार्कीले स्पष्ट पारे।