प्रदेश १ : एक सातामा ९३ संक्रमित थपिए, ९२ डिस्चार्ज

विराटनगर– प्रदेश १ मा एक साताको अवधिमा ९३ जना कोरोना संक्रमित भएका छन् । उपचारमा रहेका संक्रमित मध्ये ९२ जना डिस्चार्ज भएका छन् ।

प्रदेश १ का १४ वटै जिल्लामा संक्रमण देखिएको छ । गत वैशाख ५ गते प्रदेश १ मा पहिलो पटक उदयपुरको त्रियुगा ३ भुल्केमा संक्रमण देखिएको थियो । सोमबार साँझ सम्म संक्रमितको संख्या ४ सय ६४ पुगेको छ । २ सय ५७ जना डिस्चार्ज भएका छन् ।

मुख्यमन्त्री तथा मन्त्रिपरिषद्को कार्यालयमा उल्लेख तथ्याङ्क अनुसार असार १ गते २६ जना संक्रमित थपिए भने ८ जना डिस्चार्ज भए । असार २ गते ५ जना थपिए ७ जना डिस्चार्ज भए । असार ३ गते १४ संक्रमित थपिए ३ जना डिस्चार्ज भए । असार ४ गते ३ जना संक्रमित थपिए ४० जना डिस्चार्ज भए । असार ५ गते ३ जना संक्रमित थपिए १० जना डिस्चार्ज भए ।

त्यसैगरि असार ६ गते ११ संक्रमित थपिए उक्त दिुन कुनै संक्रमित डिस्चार्ज नभएको मुख्यमन्त्री तथा मन्त्रिपरिषद्को कार्यालयले जनाएको छ । असार ७ गते १६ संक्रमित थपिए भने १ जना डिस्चार्ज भए । असार ८ गते १५ संक्रमित थपिए भने २३ जना डिस्चार्ज भएका छन् । प्रदेश १ गते जेठ ३२ गते सम्म ३ सय ७१ संक्रमित थिए । सो अवधि सम्म १ सय ६६ जना डिस्चार्ज भएका थिए ।

प्रदेश १ मा झापामा १ सय ९० जना संक्रमित भएका छन् । झापाका १४ वटा स्थानीय तहमा संक्रमण देखिएको छ । मोरङमा १ सय २७ जना संक्रमित भएका छन् । मोरङका ११ वटा स्थानीय तहमा संक्रमण देखिएको छ । सुनसरीमा ६६ संक्रमित भएका छन् । १० वटा स्थानीय तहमा संक्रमण देखिएको छ । प्रदेश १ का भारतसँग सीमा जोडिएका झापा, मोरंग र सुनसरी तीन जिल्लाका ३५ स्थानीय तहमा संक्रमण देखिएको छ ।

प्रदेश १ का उदयपुरमा ५१, धनकुटामा ८, भोजपुरमा ६, खोटाङमा ४, ताप्लेजुङमा ३, संखुवासभा, इलाम र ते¥हथुममा २–२ र पाँचथर, ओखलढुंगा र सोलुखुम्वुमा १–१ जनामा संक्रमण देखिएको छ ।

प्रदेश १ मा हाल सम्म देखिएका संक्रमित मध्ये अधिकांश भारतबाट आएका रहेका छन् । समुदायस्तरमा उदयपुरको त्रियुगा ३ भुल्के र धनकुटा जिल्ला अस्पतालमा मात्र संक्रमण भएको प्रदेश १ का सामाजिक विकास मन्त्री जीवन घिमिरेले बताए ।

समुदायस्तरको संक्रमण नियन्त्रणमा आएको उनले बताए । उनले भने, ‘अहिले देखिएको संक्रमण क्वारेन्टिनमा मात्रै छ ।’ क्वारेन्टिकनमा देखिएको संक्रमणलाई समुदायमा नफैलन दिनका लागि प्रदेश सरकारले काम गरिरहेको उनले बताए । प्रदेश १ मा बढीमा ४ महिना भित्रमा कोरोना संक्रमणमा आउने मन्त्री घिमिरेले बताए ।

४ हजार २०० को पीसीआर

प्रदेश १ मा एक सतामा ४ हजार बढीको स्वाव संकलन भएको छ । जेठ ३२ गते सम्म १५ हजार ३ सय ६० जना शंकास्पदको नमूना संकलन गरिएको थियो । असार ८ गते सम्म १९ हजार ५ सय ६८ जनाको स्वाव संकलन भएको छ ।

एक सातामा ४ हजार २ सय ८ जनाको स्वाव संकलन भएको सामाजिक विकास मन्त्रालयले जनाएको छ । मन्त्रालयका अनुसार स्वाव संकलन गरिएका मध्ये १ हजार ५ सयको रिपोर्ट आउन बाँकी छ ।

संक्रमितको ४ स्थानबाट उपचार

प्रदेश १ मा कोरोना संक्रमितलाई विराटनगरको कोशी अस्पताल कोभिड १९ उपचार केन्द्र, सुन्दरहरैचाको पूर्वाञ्चल विश्वविद्यालय आईसोलेसन केन्द्र, सुनसरी धरानको वीपी कोइराला स्वास्थ्य विज्ञान प्रतिष्ठान धरान र उदयपुरको चौदण्डीगढी आईसोलेसन उपचार केन्द्रमा राख्ने गरिएको छ । झापा मेचीनगरपालिकाको धाईजनमा आईसोलेन केन्द्र सञ्चालनको तयारीमा छ ।

सामाजिक विकास मन्त्री घिमिरेले संक्रमितको बर्गीकरण गरेर उपचार गरिने बताए । संक्रमण देखिएका सामान्य प्रकृतिकालाई सुन्दरहरैचा, मेचीनगर र चौदण्डीगढीमा, कोरोनाको सामान्य लक्षण देखिएकालाई विराटनगर र कोरोनाको लक्षण देखिएका गंभिर विरामीलाई धरानमा उपचारको प्रवन्ध गरिने उनको भनाई छ ।