बारामा छुट्टाछुट्टै दुर्घटनामा तीन जनाको मृत्यु

काठमाडौं- बारामा सोमबार भएका छुट्टाछुट्टै सवारी दुर्घनामा परी तीन जनाको ज्यान गएको छ।

प्रहरीका अनुसार ट्रकले मोटरसाइकललाई ठक्कर दिँदा दुई जना र मिक्चर मेसिनमा च्यापिएर एक जनाको ज्यान गएको हो।

जिल्ला प्रहरी कार्यालयका अनुसार पूर्व–पश्चिम राजमार्गअन्तर्गत जितपुर सिमरा उपमहानगरपालिकामा ना ४ ख ८१६५ नम्बरको ट्रकले बा ५२ प ३९९० नम्बरको मोटरसाइकललाई ठक्कर दिँदा दुई जनाको मृत्यु भएको छ।

ट्रकको ठक्करबाट मोटरसाइकल चालक निजगढ नगरपालिका–१० का ३४ वर्षीय डम्बर लामा र ४० वर्षीय रामबहादुर मोक्तानको मृत्यु भएको छ।
लामाको घटनास्थलमै र मोक्तानको उपचारका लागि अस्पताल लैजाँदै गर्दा मृत्यु भएको जिल्ला प्रहरी कार्यालय बाराका प्रहरी निरीक्षक रुद्र कँडेलले जानकारी दिए।

एउटै दिशाबाट गुडिरहेको मोटरसाइकललाई ट्रकले पछाडिबाट ठक्कर दिएको प्रहरीले जनाएको छ।
ठक्कर दिने ट्रक र चालकलाई प्रहरी चौकी पथलैयाले नियत्रणमा लिएको छ।

यस्तै आफैंले चलाएको मिक्चर मेसिनले च्यापिएर कलैया उपमहानगरपालिका २३ मा सप्तरीको सुरुंगा नगरपालिकाका ३० वर्षीय उमाकान्त यादवको मृत्यु भएको छ।

कलैया २३ बैराठपुरस्थित बाटो र नाला निर्माणको काम गरिरहेका बेला आफंैले चलाएको अनटेस्ट मिक्चर मेसिन पल्टिँदा च्यापिएर हेल्पर यादवको घटनास्थलमै मृत्यु भएको प्रहरीले जनाएको छ।