प्रदेश १ मा २ संक्रमित थपिए, १० जना डिस्चार्ज

विराटनगर– प्रदेश १ मा शुक्रबार २ जना कोरोना संक्रमित थपिएका छन् । मोरङको बुढीगंगाका एक पुरुष र झापा दमककी एक महिलामा संक्रमण देखिएको सामाजिक विकास मन्त्रालयले जनाएको छ ।

प्रदेश १ मा २ जना थपिएसँगै संक्रमितको संख्या ४२२ पुगेको छ । प्रदेश १ बाट शुक्रबार १० जना डिस्चार्ज भएका छन् । कोशी अस्पताल कोभिड १९ उपचार केन्द्रमा उपचाररत १० जना डिस्चार्ज भएका हुन । डिस्चार्ज हुनेमा खोटाङका ३, सुनसरीका ३, उदयपुरका २ र मोरंगका २ रहेका छन् । डिस्चार्ज हुनेमा ४ महिला र ६ पुरुष २१ देखि ४० वर्ष उमेर समूहका छन् ।

डिस्चार्ज भएकाहरु जेठ २१ देखि २५ गते सम्म अस्पतालमा भर्ना भएकाहरु रहेको कोशी अस्पताल कोभिड उपचार केन्द्र व्यवस्थापन समितिका सदस्य ध्रुव उरावले जानकारी दिए । १० जना डिस्चार्ज भएपछि प्रदेश १ बाट डिस्चार्ज हुनेको संख्या २३४ पुगेको छ ।

विराटनगर, सुन्दरहरैचा र धरानमा अहिले १ सय ८६ जना उपचाररत छन् । कोशी कोभिड विराटनगरमा २३ जना, पूर्वाञ्चल विश्वविद्यालय आईसोलेसन सेन्टर सुन्दरहरैचामा ८५ र वीपी कोइराला स्वास्थ्य विज्ञान प्रतिष्ठान धरानमा ७८ जना उपचाररत छन् ।