निर्देशिका बाहिर गएर कोरोना परीक्षण नगर्नुः स्वास्थ्य मन्त्रालय

काठमाडौं– स्वास्थ्य तथा जनसंख्या मन्त्रालयले निर्देशिकामा तोकिए बमोजिमको मात्र नमुना संकलन तथा कोरोना परीक्षण गर्न सम्बन्धित निकायलाई निर्देशन दिएको छ।

कतिपय निकाय तथा व्यक्तिले आफूखुसी परीक्षण गर्न दबाब दिन थालेको गुनासोपछि मन्त्रालयले निर्देशिकाभन्दा बाहिर नजान निर्देशन जारी गरेको हो।

मन्त्रालयका प्रवक्ता डा. जागेश्वर गौतमले जथाभावी नमुना संकलन तथा परीक्षण गर्दा स्रोत र साधनको दुरुपयोग हुने भएकाले परीक्षणमा दबाब नदिन आग्रह गरेका छन्।

निर्देशिकामा संक्रमण फैलिएको देशबाट आएको, संक्रमितसँग प्रत्यक्ष सम्पर्कमा रहेको, कोरोना संक्रमितको उपचारमा ‘फ्रन्टलाइन’मा खटिएका स्वास्थ्यकर्मीलगायतलाई परीक्षण गर्नुपर्ने व्यवस्था छ।

त्यस्तै, क्वारेन्टिनमा बसेका तर कुनै पनि लक्षण नदेखाएकालाई परीक्षण विनै घर पठाउने पनि निर्देशिकामा उल्लेख छ ।

निर्देशिकाअनुसार लक्षण नदेखाएका र १४ दिन आइसोलेसनमा बसेकालाई पनि टेस्ट आवश्यक पर्दैन।