कोरोनाबाट ब्राजिलमा ५० हजारको मृत्यु, १० लाख संक्रमित

दक्षिण अमेरिकी देश ब्राजिलमा कोरोना भाइरसको फैलावट र मृत्यु तीव्र रुपमा बढिरहेको छ। त्यहाँ कोरोना संक्रमणबाट करिब ५० हजारको ज्यान गइसकेको छ भने १० लाख संक्रमित भइसकेका छन्।

पछिल्लो २४ घण्टामा मात्र ब्राजिलमा १२ सय जनाले कोरोनाका कारण ज्यान गुमाए भने २३ हजार संक्रमित थपिएका छन् ।

ब्राजिल विश्वमा सबैभन्दा धेरै कोरोना संक्रमित हुने र यसका कारण ज्यान गुमाउने देशको सूचीमा अमेरिकापछि दोस्रो नम्बरमा छ ।

आज (शुक्रबार) बिहानसम्मको तथ्यांकअनुुसार कोरोना संक्रमितको संख्या विश्वमा ८२ लाख ४३ हजार पुगेको छ। सबैभन्दा धेरै कोरोना संक्रमित हुने देशको सूचीमा पहिलो नम्बरमा अमेरिका छ भने दोस्रो नम्बरमा ब्राजिल छ र त्यसपछि क्रमशः रुस, भारत, बेलायत, स्पेन, इटली, पेरु, इरान, जर्मनी, टर्की, चिलीलगायत देश छन् ।

कोरोनाका कारण हालसम्म ४ लाख ४५ हजार ५३५ जनाको मृत्यु भइसकेको छ। चीनको वुहानबाट गत डिसेम्बर अन्तिममा सुरु भएको कोरोना भाइरसको संक्रमण विश्वका २१६ देशमा फैलिसकेको छ।