एकै दिन ६७१ जनामा कोरोना संक्रमण पुष्टि, कुल संक्रमित ७८४८ पुगे

काठमाडौं- पछिल्लो २४ घण्टामा नेपालमा ६७१ जनामा कोरोना संक्रमण पुष्टि भएको छ।

यो सहित नेपालमा कोरोना संक्रमितको कुल संख्या ७ हजार ८४८ पुगेको स्वास्थ्य तथा जनसंख्या मन्त्रालयले जनाएको छ।

बिहीबार एकै दिन थपिएकाे संख्या अहिलेसम्मकै उच्च हाे।

बुधबार एकै दिन ५ सय ८६ जनामा कोरोना संक्रमण पुष्टि भएको थियो। नेपालका ७४ वटा जिल्लामा कोरोना संक्रमण फैलिइसकेको मन्त्रालयले जनाएको छ।

काेराेना संक्रमणबाट मृत्यु हुनेकाे संख्या २२ पुगेकाे छ। अहिलेसम्म १ हजार १८६ जना संक्रमणमुक्त भएका छन्।

हालसम्म रसुवा, ओखलढुंगा र मुस्ताङमा मात्रै कोरोना संक्रमित भेटिएका छैनन्।

नेपालमा साढे १ लाख भन्दा बढी मानिसमा पीसीआर बिधिबाट कोरोना परीक्षण गरिएको मन्त्रालयले जनाएको छ।

नेपालमा आज देखिएका संक्रमित मध्ये अर्घखाँचीका ९७ जना, डडेलधुराका ८४ जना, दैलेखमा ८७ जना, अछामका ४४ जना, बाजुराका ४१ जना, कैलालीका ४२ जना, रौतहट ३४ जना, सुर्खेतमा ३४ जना, नवलपरासी पुर्वका ३१ जना, धनुषाका २९ जना, बैतडीका २५ जनामा कोरोना संक्रमण पुष्टि भएको छ ।

त्यस्तै कपिलवस्तु १६ जना, तनहुँका १५ जना, रुपन्देहीका १२ जना, गोर्खाका ११ जना, स्याङ्जाका ११ जना, पर्वतका ९ जना, पाल्पाका ६ जना, डोटीका ५ जना, दाङका ४ जना, गुल्मीका /बर्दियाका/बाँकेका र भक्तपुरका ३/३ जना, काठमाडौं/नुवाकोट/सर्लाही/बझाङ/कञ्चनपुरका २/२ जना संक्रमित भेटिएका हुन् ।

त्यस्तै मोरङ /सिन्धुपाल्चोक/ललितपुर/ नवलपरासी/महोत्तरी/सिन्धुली/चितवनका/बाग्लङका/मनाङका र रोल्पाका १/१ जनामा संक्रमण पुष्टि भएको हो ।