शम्भु सदा मृत्युका सम्बन्धमा न्यायिक छानबिन गर्न कांग्रेसको माग

काठमाडौं- प्रमुख प्रतिपक्षी नेपाली कांग्रेसले धनुषाका सबैला नगरपालिका १२ रघुनाथपुरका शम्भु सदा (मुसहर) को शंकास्पद मृत्युका सम्बन्धमा न्यायिक छानबिन गर्न माग गरेको छ।

कांग्रेसले घटनाबारे छानबिन गरी दोषीमाथि कारबाही गर्न र मृतकका परिवारलाई उचित क्षतिपूर्ति दिन सरकारसँग माग गरेको हाे।

सदाको शव केही दिनअघि प्रहरी हिरासतमा रहेका बेला झुन्डिएको अवस्थामा फेला परेको थियो।

यस्तै भारतबाट रोजगारी फर्किएका धनुषाको सहिद नगरपालिका ८ का वीरेन्द्र यादवको खान नपाएर मृत्यु भएको सम्बन्धमा पनि कांग्रेसले ध्यानाकर्षण भएको जनाएको छ।

कांग्रेस मुख्य सचिव कृष्णप्रसाद पौडेलद्वारा बिहीबार जारी विज्ञप्तिमा भनिएको छ, 'लकडाउनको अवस्थामा सिमानामा सरकारले खाने, बस्ने र गुणस्तरीय क्वारेन्टिनको व्यवस्था नगरेका कारण अनाहकमा नागरिकले मृत्युवरण गर्नुपर्ने जटिल परिस्थितिप्रति सिर्जना भएको उक्त घटनाप्रति कांग्रेसको ध्यानाकर्षण भएको छ।'