प्रदेश १ का ४० जना संक्रमणमुक्त, मन्त्रीले गरे विदाइ

प्रदेश १ बाट बिहीबार ४० जना कोरोना संक्रमणबाट मुक्त भएर डिस्चार्ज भएका छन् ।

पूर्वाञ्चल विश्वविद्यालय आइसोलेसन उपचार केन्द्र, सुन्दरहरैचामा उपचाररत ४० जना कोरोना संक्रमित डिस्चार्ज भएका हुन । प्रदेश १ मा धेरै संख्यामा डिस्चार्ज भएको पहिलो पटक हो ।

डिस्चार्ज हुनेमा सुनसरीका १६, झापाका ११, मोरङका ९ र भोजपुरका ४ जना छन् । उनीहरु १५ देखि ४७ वर्ष उमेरका पुरुष छन् । सुन्दरहरैचाबाट डिस्चार्ज हुनेहरुलाई बिहीबार प्रदेश १ का सामाजिक विकास मन्त्री जीवन घिमिरे, प्रदेश सांसद लोकप्रसाद संग्रौला, राजकुमार ओझा, सुन्दरहरैचाका प्रमुख शिव ढकाल, उपप्रमुख धना तामाङ लगायतले विदाइ गरे ।

डिस्चार्ज हुनेहरु गत जेठ २२ गतेदेखि २६ गतेसम्म भर्ना भएकाहरु रहेको पूर्वाञ्चल विश्वविद्यालय चिकित्साशास्त्र संकायका डीन डा. शैलेशमणि पोखरेलले जानकारी दिए । प्रदेश १ मा ४० जना डिस्चार्ज भएसँगै डिस्चार्ज हुनेको संख्या २२४ पुगेको छ । संक्रमितको संख्या ४१६ छ ।

संक्रमितमध्ये २९ जना कोशी कोभिड अस्पताल विराटनगर, ८५ जना पूर्वाञ्चल विश्वविद्यालय गोठगाउँ र ७८ जना वीपी कोइराला स्वास्थ्य विज्ञान प्रतिष्ठान धरानमा उपचाररत छन् ।