रोपाइँ सुरु भो, मल छैन

सर्लाही - जिल्लामा धान रोप्ने समयमा मल अभाव भएपछि किसान चिन्तित बनेका छन्। रोपाइँका लागि खेतमा ब्याड तयार हुँदा मल नपाएपछि उनीहरु चिन्तित बनेका छन्।

केही व्यापारीले मल राखे पनि अभावको फाइदा उठाउँदै चर्को मूल्यमा बिक्री गर्दै आएका उनीहरुले गुनासो गरेका छन्।

कोरोना भाइरसका कारण जिल्लामा मल नआउँदा बिक्री वितरणमा समस्या भएको कृषि सामग्री संस्थान लिमिटेडले जनाएको छ।

बिउ राख्ने बेलामा मल नहाल्दा ब्याड यस वर्ष राम्रो हुन नसकेको जनाइएको छ। उनीहरुले नेपाली बजारमा अभाव हुँदा भारतबाट ल्याएर पनि खेती गर्दथे। यस वर्ष कुनै उपाय नभएको उनीहरुको भनाइ छ।

जिल्लामा अहिले मलको अभाव रहेको सो लिमिटेडका प्रमुख बज्रमणि लामाले बताए। उनका अनुसार धानखेतीका लागि मात्रै जिल्लामा एक हजार पाँच सय मेट्रिक टन डीएपी र दुई हजार मेट्रिक टन युरिया मल आवश्यक रहेको र अहिले संस्थानमा करिब एक सय ५० मेट्रिक टन डीएपी र २ ट्रक युरिया बाँकी छ।

“अहिलेलाई डीएपीको माग बढ्दो छ। गोदाममा भएकोले एक–दुई गाउँलाई पनि पुग्दैन। साउनतिर रोपाइँ भइसकेपछि युरिया चाहिन्छ। माग गरेका छौैं। आयो भने सहज हुन्छ।” उनले भने। -रासस