आरडीटी पोजेटिभ, पीसीआर रिपोर्ट नआउँदै आत्महत्या

काठमाडौं- अर्घाखाँचीको क्वारेन्टिनमा एक जनाले आत्महत्या गरेका छन्। शीतगंगा नगरपालिका–५ स्थित क्वारेन्टिन रहेका स्थानीय ४५ वर्षीय देवबहादुर विकले मंगलबार राति आत्महत्या गरेका हुन्।

अर्घाखाँचीका प्रमुख जिल्ला अधिकारी विजयराज पौडेलका अनुसार ती पुरुषको शव क्वारेन्टिन नजिकैको रुखमा झुन्डिएको अवस्थामा फेला परेको छ। विद्यालयको कोठामा सँगै बस्ने अन्य दुई जना निदाएपछि ती पुरुष बाहिर निस्किएको प्रमुख जिल्ला अधिकारी पौडलले बताए।

स्थानीयले रुखमा झुन्डिएको अवस्थामा पुरुषको शव देखेपछि प्रहरीलाई खबर गरेका थिए।

नगरपालिकाका मेयर सूर्यप्रसाद अधिकारीले क्वारेन्टिनमा बसेका तीन जनाको आरडीटी पोजेटिभ आएकामध्ये एक जनाले आत्महत्या गरेको बताए।
जेठ २६ गते पीसीआर परीक्षणका लागि स्वाब संकलन गरी भैरहवा पठाइएको छ।

‘आरडीटी पोजेटिभ आएका तीन जना एउटै कोठामा सुतेका थिए’, अधिकारीले भने, ‘बिहान ३ बजेतिर आफूसँगै रहेका दुईजनालाई समेत उठाई शौचालय गएको र आएपछि सँगै रहेका साथीहरु सुतेपछि फर्किएर गई आत्महत्या गरेका छन्।’

विक गत जेठ १० गते भारतबाट आएर क्वारेन्टिन बस्दै आएका थिए। नगरप्रमुख अधिकारीले स्वाब रिपोर्ट चाँडो दिन अस्पतालमा खबर गरिएको बताए। रिपोर्ट आएपछि मात्र शव रुखबाट निकालिने उनको भनाइ छ।