प्रदेश २ मा एकैदिन थपिए ७६ संक्रमित, सबैभन्दा बढी धनुषाका

जनकपुरधाम- प्रदेश २ मा एकैदिन ७६ जना कोरोना भाइरस (कोभिड-१९)का संक्रमित थपिएका छन्। स्वास्थ्य तथा जनसंख्या मन्त्रालयले बिहान सार्वजनिक गरेको विवरण अनुसार थपिएका ७६ जनामा सबैभन्दा बढी धनुषाका हुन्।

मन्त्रालयको पछिल्लो विवरण अनुसार धनुषामा २९, महोत्तरीमा १७, सप्तरीमा १४, सर्लाहीमा ७, सिरहामा ६ र रौतहटको तीनजनामा कोरोना संक्रमण पुष्टि भएको हो।

संक्रमण पुष्टि भएका धनुषाको २९ जनामध्ये १८ जना लक्ष्मिनीया गाउँपालिकाको क्वारेन्टिनका रहेको प्रमुख जिल्ला अधिकारी कोषहरि निरौलाले जानकारी दिए।

यसैगरी, धनुषा घर भएका ८ जनाले महोत्तरीको जलेश्वरमा स्वाब दिएको उनले बताए। प्रमुख जिल्ला अधिकारी निरौलाले धनुषामा थप भएकामध्ये प्रादेशिक अस्पतालको आइसोलेसनमा उपचार भइरहेका दुई जना र एक जना जनकनन्दनी गाउँपालिकाको रहेको बताएका छन्।

संक्रमण पुष्टि भएकामध्ये अधिकांश भारतको विभिन्न स्थानबाट आएका व्यक्ति रहेको उनको भनाइ छ।

संक्रमणको दर बढ्दै गएपछि आइसोलेसन बेडको समस्या देखिएको उनले बताए। प्रादेशिक अस्पताल जनकपुरमा सञ्चालन भएको कोभिड विशेष अस्पतालको आइसोलेसन बेड पहिलेदेखि भरिभराउ रहेको बताउँदै उनले महोत्तरीको जलेश्वर अस्पतालमा समेत आइसोलेसन बेडको अभाव रहेको जानकारी दिए।

बिहीबार थपिएका २९ संक्रमितलाई कहाँ राख्नेबारे छलफल भइरहेको उनले बताए।