भेनेजुएलामा जेलमा खाना ल्याउन नदिएपछि दंगा, ४६ जनाको मृत्यु

भेनेजुएला- भेनेजुएलाको एक कारागारमा कोरोना भाइरस सर्छ भन्दै बाहिरबाट खाना ल्याउन बन्द गरेपछि भएको दंगामा ४६ जनाको मृत्यु भएको छ ।

पोर्तुगिसा राज्यस्थित कारागारमा भएको दंगामा अन्य ६० जना घाइते भएका छन् ।

कैदीहरु कारागारबाट भाग्न खोज्दा हुल्दंगा भएको मन्त्री आइरिस भरेलालाई उधृत गर्दै बीबीसीले उल्लेख गरेको छ । यस क्रममा कारागारका निर्देशक समेत गोली लागेर घाइते भएका छन् ।

कैदीहरुलाई आफन्त र परिवारले लगेको खाना नदिएपछि यस्तो अवस्था उत्पन्न भएको बीबीसीले लेखेको छ । भेनेजुएला सरकारले कोरोना भाइरस संक्रमणको त्रासका कारण कैदीहरुलाई खाना दिन प्रतिबन्ध लगाएको छ ।

भेनेजुएलामा ३ सय ३५ जनामा कोरोना भाइरस संक्रमण देखिएको छ । तीमध्ये १० जनाको मृत्यु भइसकेको छ ।

जेलमा भने संक्रमण फैलन सक्ने भन्दै चिन्ता व्यक्त गरिएको थियो । भेनेजुएलामा ५ सय जेल छन् । जहाँ १ लाख १० हजार कैदीहरु छन् ।

कैदीको तुलनामा जेल थोरै भएको र भीड हटाउनुपर्ने भन्दै मानवअधिकारकर्मीहरुले पटक पटक माग गर्दै आएका थिए ।