भारतमा कोरोनाबाट एकै दिनमा ७० जनाको मृत्यु, संक्रमितको संख्या ३१ हजार नाघ्यो

काठमाडौं- तिब्र रुपमा फैलिएको कोरोना भाइरसबाट छिमेकी मुलुक भारतमा मंगलबार एकै दिनमा ७० जनाको मृत्यु भएको छ ।

भारतमा कोरोनाबाट एकै दिनमा ज्यान गुमाउनेको संख्या यो अहिलेसम्मकै सबैभन्दा धेरै हो । वैशाख १४ गते आइतबार एकै दिनमा ६० जनाको मृत्यु भएको थियो । त्यो रेकर्ड तोड्दै मंगलबार ७० जनाको मृत्यु भएको दैनिक भास्कर अनलाइनले जनाएको छ ।

उसका अनुसार मंगलबार मात्रै कोरोनाबाट महाराष्ट्रमा ३१ र अहमदावादमा १९ जनाले ज्यान गुमाएका छन् । भारतमा अहिलेसम्म कोरोनाबाट १ हजार ११ जनाको मृत्यु भएको छ ।

भारतमा कोरोनाबाट ज्यान गुमाएकामध्ये सबैभन्दा धेरै महाराष्ट्रमा रहेका छन् । जहाँ ४०० जनाको मृत्यु भएको छ ।

यस्तै गुजरातमा १८१, मध्यप्रदेशमा १२०, दिल्लीमा ५४, राजस्थानमा ५२, उत्तर प्रदेशमा ३४, आन्ध्र प्रदेशमा ३१, तेलंगानामा २६, तमिलनाडुमा २५ जनाको मृत्यु भएको छ ।

पश्चिम बंगाल २२, कर्नाटक २०, पंजाव १९, जम्मू कास्मिर ८, हरियाणा ५, केरला ३, झारखण्ड ३, बिहार २, हिमाञ्चल २, आसाम १, मेघालय १, ओडिसा १ र पुडुचेरी १ जनाको कोरोनाबाट मृत्यु भएको छ ।

यस्तै भारतमा कोरोनाबाट ३१ हजार ३ सय २४ जना संक्रमित भएका छन् । पछिल्लो २४ घण्टामा मात्रै १ हजार ८ सय ७३ जना नयाँ संक्रमित थपिएका छन् ।

भारतमा पछिल्लो एक सातामा दिनहुँ १५ सय भन्दा बढि नयाँ संक्रमित थपिराखेका छन् । सोमबार १ हजार ५ सय ६१, आइतबार, १ हजार ६ सय ७ र शनिबार १ हजार ८ सय ३६ संक्रमित थपिएका थिए ।