आई लिग रद्द, मोहन बगान बन्यो च्याम्पियन

मंगलबार बसेको अल इन्डिया फुटबल फेडेरेसन(एआईएफएफ)को बैठकले मोहन बगानलाई आई लिगको नयाँ विजेता घोषित गरेको छ। उसले २८ खेल बाँकी रहँदै सिजन रद्द गरेर शीर्ष स्थानमा रहेको मोहन बगानलाई विजेता बनाएको हो।

शनिबार साँझ एआईएफएफ लिग कमिटी बैठकले मोहन बगानलाई आई लिगको विजेता घोषणा गर्न प्रस्ताव गरेको थियो। कमिटी अध्यक्ष सुभ्रता दत्तको अध्यक्षतामा बसेको भिडियो कन्फरेन्स बैठकमा शीर्ष स्थानमा रहेको मोहन बगानलाई सिजन २०१९-२० को लिग विजेता घोषणा गर्न प्रस्ताव गरिएको थियो। एआईएफएफको सोही निर्णयअनुसार उसलाई च्याम्पियन बनाइएको हो। मोहन बगान विजेता बन्दै भारतीय एक करोड रुपैयाँ हात पारेको छ। उसले जारी लिगमा १६ खेल खेल्दै ३९ अंक बटुलेको थियो।

यस्तै बैठकले च्याम्पियनबाहेकको रकम (अन्य पुरस्कार राशी) १० क्लबलाई बराबरी बाँडने प्रस्ताव गरेको थियो। जसलाई एआईएफएफले सदर गरेको छ। त्यसैले १० क्लबले साढे १२ लाखका दरले पुरस्कार पाएका छन्। यो वर्ष आई लिगमा कुनै पनि क्लब रेलिगेशनमा पनि नजाने भएको छ।