महिला फुटबल अझै एक बिलियन डलरको फाइदामा छ : फिफा

महिला फुटबल अझै एक बिलियन डलरको फाइदामा रहेको फिफाले बताएको छ। विश्वव्यापी रुपमा फैलिएको कोरोना भाइरसका कारण शङ्कामा रहेको फुटबलको लगानी सुरक्षित रहेको फिफाले बताएको हो।

विश्वका सबैजसो मुलुकमा कोभिड १९का कारण लकडाउन चलेको छ। र, फुटबलका गतिविधि पनि भएका छैनन्।

तर, यस्तो अवस्थामा पनि सन् २०१९ बाट २०२१ सम्मको फुटबलमा लगानी रद्द नहुने फिफाले बताएको छ। फिफाका एक अधिकारीले भने, ‘यो कोषबारे फिफाले पहिल्यै सम्झौता गरेको थियो, जसकारण अहिलेको अवस्थाले रकममा प्रभाव पार्ने छैन।‘

बेलायती मिडिया द गार्जियनसँग कुरा गर्दै उनले भने, ‘यो कोष महिला फुटबलको क्षमता वृद्धि, प्रतिस्पर्धा, पूर्वाधार विकास कार्यक्रम लगायतका क्षेत्रमा लगानी गरिने छ। यसका साथै लिडरसिप, प्रोफेसनलाइजेसन र प्राविधिक कार्यक्रमका लागि रकम लगानी गरिने छ।‘

गत वर्षको फिफा विश्वकपबाट महिला फुटबल अझै माथि उठेको विश्वास गरिएको छ। त्यो विश्वकप १.२ बिलियन मानिसले हेरेको बताइएको छ।