बन्दाबन्दी लागू गर्न नागरिकमाथि भइरहेको अभद्र व्यवहारप्रति नागरिक समाजको आपत्ति

काठमाडौं– कोभिड–१९ को रोकथामका लागि जारी बन्दाबन्दी लागू गराउन मुलुकको विभिन्न भागमा नागरिकमाथि भइरहेको अभद्र व्यवहारप्रति जवाफदेहिता निगरानी समितिले आपत्ति प्रकट गरेको छ।

आज प्रेस विज्ञप्ति जारी गर्दै सुरक्षाकर्मीद्वारा नागरिकमाथि भएको गैरकानुनी शक्तिको प्रयोग, दुव्र्यवहार एवं कुटपिटका घटनाप्रति ध्यानाकर्षण भएको समितिले जनाएको हो।

राज्यबाट अतिरिक्त संरक्षणको खाँचो भएका विपन्न तथा श्रमजिवी नागरिकले गन्तव्यमा पुग्न भोगिरहेका दुःख–सास्तिका घटनाप्रति पनि समितिले चासो राखेको छ।

स्वास्थ्यकर्मीमाथि भएको कुटपिट र राजमार्गमा हिँडिरहेका नागकिरमाथि भइरहेको सरकारी व्यवहारप्रति समितिले निन्दा गरेको छ।

नागरिकमाथि अभ्रद व्यवहार गर्ने काम तत्काल बन्द गर्न र त्यस्ता कार्यमा संलग्न प्रहरीमाथि अनुसन्धान गरी कानुन बमोजिम कारबाही गर्न समितिले माग गरेको छ।

समितिले भोकभोकै हिँडिरहेका नागरिकलाई तत्काल उद्दार गरी गन्तव्यसम्म पु¥याउने व्यवस्था गर्न पनि तिनै तहको सरकारसँग माग गरेको छ।
चरण प्रसाई, संयोजक रहेको समितिमा गोविन्द बन्दी, मन्दिरा शर्मा, प्रा. कपिल श्रेष्ठ, डा. गौरीशंकरलाल दास, कनकमणि दिक्षित, डा.गोपाल सिवाकोटी, शोभाकर बुढाथोकी, सुमन अधिकारी सदस्य छन्।

त्यस्तै, देवी सुनवार, विरेन्द्र थपलिया, दिनेश त्रिपाठी, ओमप्रकाश अर्याल, राजु प्रसाद चापागाई, सवित्री श्रेष्ठ, जनक राउत, ईन्द्रप्रसाद अर्याल, माहामुश्वर आचार्य, बाबुराम गिरी, राजन कुईकेल, बिकास बस्नेत, अनिता थपलिया, भक्त विश्वकर्मा, पंकजलाल कर्ण, बद्रि भुसाल, रुकमनी महर्जन, रणधिर चौधरी पनि सदस्य छन्।