लकडाउनमा पनि रोकिएन चोरी–तस्करी

भैरहवा– लकडाउको समयमा पनि सीमावर्ती क्षेत्रमा चोरी–तस्करी नरोकिएको स्थानीयले बताएका छन्। यस समयमा तस्करी गर्न अझ सजिलो भएको स्थानीयको भनाइ छ।

‘सबैजना घरभित्र छन् । यो बेला झनै चोरी तस्करी बढेर गएको छ,’ रुपन्देहीको मर्चवारका स्थानीय गोबद्र्धन केवटले भने, ‘अरुबेला स्थानीय घरबाहिर हुँदा चोरी तस्करी भएको देख्थे अनि प्रहरीलाई खबर गर्थे । तर यतिबेला उनीहरुलाई अवरोध गर्ने कोही छैन ।’

स्थानीय लुम्बिनी खबरका पत्रकार समेत रहेका स्थानीय बासिन्दा असलम खानले लकडाउनको मौका छोपेर यतिबेला सीमावर्ति क्षेत्रमा चोरी तस्करी गर्नेहरु सक्रिय भएको बताए ।

उनले भने, ‘जिल्लाको मर्चवार क्षेत्रमा यतिबेला चोरी तस्करी ह्वात्तै बढेर गएको छ । पहिले पहिले रातिमा हुन्थ्यो, अहिले त दिउँसै भइरहेको छ ।’ खानका अनुसार नेपालबाट हरियो मटर र रक्सी पारि गइरहेको छ भने भारतबाट चिनी, दाल, चामल, तेल नेपाल भित्रिरहेको छ ।

खानले चोरी तस्करी बढेको विषयमा स्थानीय प्रहरीलाई बारम्बार जानकारी गराउँदा पनि सुनुवाई नभएको गुनासो समेत गरे । उनले भने, ‘चोरी तस्करीमा संलग्नहरुले कोरोना पनि ल्याउन सक्छन्, रोकिदिनु पर्यो, सीमामा आवतजावतमा कडाइ गर्नुपर्यो भनेर बारम्बार भनिरहेका छौं । तर प्रहरी कानमा तेल हालेर बसेझैं छ ।’

स्थानीयले सीमावर्ती क्षेत्रमा भइरहेको चोरीतस्करीको तस्बिर र भिडियो फेसबुकमा हालेर स्थानीय प्रशासनको ध्यानाकर्षण पनि गराएका छन् ।

स्थानीय मर्चवार सन्देश पत्रिकाका पत्रकार हृदयराम गुप्ताले मर्चवारमा लकडाउनको बेला पनि चोरी तस्करी नरोकिएको भन्दै तस्बिरसहित प्रशासनको ध्यानाकर्षण गराएका छन् । उनले भने, ‘समरीमाई गाउँपालिका वडा नं. १ सँग जोडिएको भारतको सीमा क्षेत्रबाट आवतजावत पूर्व रूपले रोकिएको छैन । दिउँसो नै मदिराको तस्करी भइरहेको छ ।’

स्थानीयले मदिरा तस्करी भइरहेको देखेपछि प्रहरीलाई खबर गरेका थिए । तर प्रहरी ढिला आउँदा धेरैजसो साइकल भागे पनि एकजनालाई पक्राउ गरी एक सय थान रक्सीको बोतल बरामद गरेको छ ।

रुपन्देहीका मर्चवार, केवटलिया, पीपरीहीया, भगवानपुर, चनौली बगाह, कालिदह, बगौली, चन्नी, करौता, थुमुहवा पीपरहवा, मुडुला लगायतका नाकाबाट दैनिक चोरी तस्करी गरेर दाल, तेल र चामल लगायतका सामान भित्रिरहेको छ भने यताबाट मटर र रक्सी चोरी निकासी भइरहेको छ ।

जिल्लाको केवटलिया नाकाबाट खाने तेल, चामल, जिउँदो कुखुरा, इनडक्सन चुल्होको तस्करी भइरहेको स्थानीय हरेराम मल्लाहले बताए । उनले भने, ‘पुलिस आउँदै आउँदैन, यहाँ जसले जे गरे पनि हुन्छ ।’

लकडाउनको अवधिमा पनि यहाँ खाद्यान्न र किराना पसलहरु खुलेका छन् । ती खुलेका पसलहरुले सामानको अभाव भएको भन्दै अधिक मूल्य लिने गरेको समेत गुनासो आइरहेको छ । बजारमा ग्यास सिलिन्डर पूरा पाउन छाडेको उपभोक्ताको गुनासो छ ।

उपभोक्ता हित संरक्षण मञ्च रुपन्देहीका प्रमुख सल्लाहकार समेत रहेका भरतबहादुर केसीले भने, ‘यतिबेला धमिलो पानीमा माछा मार्न खोज्नेहरु सक्रिय छन् । उनीहरुले कोरोनाको त्रासका बीच पनि कालोबजारी गर्न छाडेका छैनन् । स्थानीय तहका जनप्रतिनिधि र प्रशासनले तत्काल अनुगमन गर्नुपर्यो ।’

प्रहरी प्रशासनले लकडाउनको अवधिमा सीमावर्ती क्षेत्रमा सामान्य अवस्थामा भन्दा सुरक्षा तैनाथी बढाएको बताएको छ । मर्चवार क्षेत्रमा मर्चवार इप्रका, मझगावा इप्रकामा प्रहरी निरीक्षकको कमान्डमा प्रहरी तैनाथी छ ।

यसैगरी दुई मुहान, मजगाव, पुर्निकोटमा सशस्त्र प्रहरी निरीक्षकको कमान्डमा विओपी र बेस रहेको छ ।