कोरोना रोक्ने नाममा त्रास बढाएको भन्दै ब्राजिलका स्वास्थ्यमन्त्री बर्खास्त

काठमाडौं- कोरोना भाइरसको रोकथामको नाममा त्रास फैलाएको भन्दै ब्राजिलका राष्ट्रपतिले स्वास्थ्यमन्त्रीलाई पदबाट बर्खास्त गरेका छन् ।

स्वास्थ्यमन्त्री लुइज हेनरिक मनडेटाले एक टेलिभिजनमा दिएको अन्तरवार्तामा आफ्नो आलोचना गरेको र कोरोना रोक्ने नाममा त्रास फैलाएको भन्दै उनलाई राष्ट्रपति जायर बोलसोनारोले पदबाट हटाएका हुन् ।

टेलिभिजन अन्तरवार्तामा स्वास्थ्यमन्त्री हेनरिकले कोरोनासँगको युद्ध जित्ने एकमात्रै उपाय भनेको लकडाउन जारी राख्दै सामाजिक दुरी कायम राख्नु पर्नेमा जोड दिएका थिए । उनले सरकार एकजुट भएर यो संकट समाधान गर्नुपर्ने बताएका थिए । उनको यो अभिव्यक्तिलाई राष्ट्रपतिको आलोचना गरेको रुपमा अर्थाइएको छ ।

राष्ट्रपति जायर बोलसोनारोले कोरोना एक ‘सामान्य फ्लु’ जस्तै भएकाले आतिनु नपर्ने बताउँदै आएका थिए । उनले लकडाउन, सामाजिक दुरी लगायतका गतिविधिले जनतामा त्रास फैलिने भएकाले यी सब गर्न नहुनेमा जोड दिदै आएका थिए ।

यसविपरित स्वास्थ्यमन्त्रीले अभिब्यक्ति दिएपछि उनलाई पदबाट बर्खास्त गरिएको बीबीसीले उल्लेख गरेको छ । स्वास्थ्यमन्त्री हेनरिक आफैंले पदबाट बर्खास्त गरिएको ट्वीट गरेर जानकारी गराएका छन् । उनलाई पदबाट हटाइएसँगै घरभित्रै बसेका ब्राजिलका नागरिकले थाल थटाएर राष्ट्रपतिको विरोध गरेका छन् ।

ब्राजिलमा कोरोनाबा अहिलेसम्म ३० हजार ६ सय भन्दा बढि संक्रमित भएका छन् भने १ हजार ९ सय ४७ जनाको मृत्यु भएको छ ।