लकडाउनको बेला शिकार खेल्ने हतियारसहित पक्राउ

भैरहवा– लकडाउनको बेला हतियारसहित जंगलमा शिकार खेल्न पुगेका कपिलवस्तुमा पक्राउ परेका छन् ।

बुधबार साँझ हतियारसहित कपिलवस्तुको तिलौराकोट साझेदारी वन र बाणगंगा नगरपालिका वडा नं. १० वनकट्टीको जंगलमा शिकार खेल्न पुगेका ६ जना पक्राउ परेका हुन् ।

तिलौराकोटबाट दुई जना र वाणगंगाबाट ४ जना हतियार सहित पक्राउ परेको डिभिजन वन कार्यालय कपिलवस्तुका प्रमुख इश्वरी पौडेलले जानकारी दिए ।

पक्राउ पर्नेमा रुपन्देही जिल्ला कंचन गाउँपालिका वडा नं. ५ भैसाहिका ६९ वर्षीय बान्छु थारु, ५० वर्षीय सुकइ थारु, २८ वर्षीय प्रभु थारु र ३० वर्षीय राजकुमार थारु रहेका छन् ।

उनीहरुलाई बनकट्टी जंगलबाट पक्राउ गरिएको हो । यसैगरी तिलौराकोट साझेदारी वनबाट कपिलवस्तु नगरपालिका वडा नं ९ बस्ने वर्ष ५१ का मनिराम थारु र वर्ष ४५ का त्रीलोकी केवट पक्राउ परेका हुन ।

उनीहरुको साथबाट भरुवा वन्दुक १ , चक्कु १ र वन्दुकमा प्रयोग हुने सामान, ११ थान जंगली जनावरलाई पासो थाप्ने जाल सहित बनको गस्ती टोलीले पक्राउ गरेको हो ।

पक्राउ परेका ६ जना उपर राष्ट्रिय निकुन्ज तथा वन्यजन्तु संरक्षण ऐन २०२९ अनुसार वन्य जन्तु सिकार सम्वन्धी मुद्दा चलाइने र सोही ऐनअनुसार कारवाही प्रक्रिया अघि बढ्नेछ।