दक्षिण एसियामा कोरोनाबाट ५२१ को मृत्यु, कुन देशमा कति संक्रमित ?

काठमाडौं- पछिल्लो एक सातामा दक्षिण एसियाका अधिकांश मुलुकहरुमा कोरोनाको संक्रमण ह्वातै बढेको छ ।

मंगलबार बिहानसम्ममा दक्षिण एसियाका ८ मुलुकमा अहिलेसम्म १७ हजार ८ सय ८५ संक्रमित भेटिएका छन् भने ५ सय २१ को मृत्यु भएको छ ।

मृत्यु र संक्रमितका हिसावले भारत कोरोनाबाट सबैभन्दा बढि प्रभावित भएको छ । जहाँ पछिल्लो एक सातामा संक्रमितको संख्या दोब्बर पुगेको छ भने मृतकको संख्या तेब्बरले बढेको छ ।

भारतमा कोरोनाबाट १० हजार ४ सय ५३ जना संक्रमित भएका छन् भने ३ सय ५८ जनाको मृत्यु भएको छ । पाकिस्तानमा ५ हजार ७ सय ७ जना संक्रमित हुँदा ९६ जनाको मृत्यु भएको छ ।

दक्षिण एसियामा कोरोनाबाट तेस्रो प्रभावित मुलुकको सूचीमा बंगलादेश देखिएको छ । जहाँ ८०३ जना संक्रमित भेटिएका छन् भने ३९ जनाको मृत्यु भएको छ । अफगानिस्तानमा ६६५ जनामा संक्रमण पुष्टि हुँदा २१ जनाको कोरोनाबाट मृत्यु भएको छ ।

श्रीलंकामा अहिलेसम्म २१८ जना संक्रमित भेटिएका छन् भने ७ जनाको मृत्यु भएको छ । माल्दिभ्स, नेपाल र भुटानमा भने कोरोनाबाट अहिलेसम्म कसैको पनि मृत्यु भएको छैन् ।

माल्दिभ्समा २० जना संक्रमित भेटिएका छन् भने नेपालमा १४ जनामा कोरोना पुष्टि भएको छ । कोरोनाबाट सबैभन्दा कम प्रभावित भुटानमा भने ५ जना मात्रै संक्रमित भेटिएका छन् ।